काठमाडौं – नेपाली फिल्म ‘दर्पण छायाँ २’ बाट अभिनयमा परिचित फिरोज तिमल्सिनाले गायनमा पनि आफ्नो यात्रा अघि बढाउँदै नयाँ गीत ‘यो कस्तो खुसी’ को भिडियो सार्वजनिक गरेका छन् । ‘नेपाल आइडल’ र ‘द भ्वाइस अफ नेपाल’ को पहिलो सिजनमा समेत संलग्न फिरोजले आफ्नो गायन यात्रालाई निरन्तरता दिँदै यस गीतमा स्वर दिएका छन् । गीतमा मिलन पोखरेलका शब्द र प्रकाश नेपालीको सङ्गीत रहेको छ ।
हाल अध्ययनको क्रममा संयुक्त राज्य अमेरिकामा रहेका फिरोजले यो गीतमार्फत आफूभन्दा टाढा रहेका प्रेमिल जोडीको कथा प्रस्तुत गरेको बताए । उनले भने, “प्रवासमा भए पनि सङ्गीतप्रतिको लगावलाई म छोड्न सकेको छैन । यस गीतलाई टाढा रहँदा पनि मायामा रहेका जोडीको भावनामा स्वर दिएको हुँ । आशा छ, यसले टाढिएर पनि मायामा रहेका जोडीलाई भावनात्मक रूपमा बलियो बनाउन मद्दत पुर्याउनेछ ।”
यस गीतको छायाङ्कन अमेरिकाको कोलोराडो राज्यका रमणीय दृश्यमा गरिएको छ । भिडियोमा ‘दर्पण छायाँ २’ बाट अभिनयमा उदाएकी सहारा कार्की र मनोज श्रेष्ठले अभिनय गरेका छन् । भिडियोको निर्देशन फिरोजले अनुप गिरीसँग मिलेर गरेका हुन् भने, सम्पादन, छायाङ्कन, र रङ्ग संयोजनको जिम्मा पनि निर्देशक गिरीले नै सम्हालेका छन् ।
फिरोजले आफ्नो यो नयाँ गीत आफ्नै युट्युब च्यानलमार्फत सार्वजनिक गरेका छन् ।
भिडियो: