काठमाडौं – दक्षिण भारतीय चलचित्र ‘कंगुवा’ अब नेपालमा रिलिज नहुने भएको छ । यस हप्ता रिलिजको तयारी भए पनि अन्तिम समयमा आएर नेपालमा यसको प्रदर्शन रोकिएको हो । वितरक स्रोतका अनुसार देशभरका चलचित्र हलहरूलाई यो जानकारी गराइसकिएको छ ।
नेपालमा ‘कंगुवा’ रिलिज नहुनुको मुख्य कारण नेपाली चलचित्र ‘पूर्ण बहादुरको सारङ्गी’ हो । हाल यो चलचित्रले लगातार रेकर्ड तोडिरहेको छ, जसले गर्दा हललाई अर्को चलचित्रलाई ठाउँ दिन कठिनाइ भइरहेको छ । साथै, अर्को प्रतीक्षित नेपाली चलचित्र ‘ह्रस्व दीर्घ’ पनि सयै साता रिलिज हुने भएकाले हलमा शो पाउन ‘कंगुवा’लाई समस्या हुने देखिएको थियो ।
दुई हप्ता अगाडि रिलिज भएका बलिउड चलचित्रहरू ‘सिंघम अगेन’ र ‘भुलभुलैया ३’लाई समेत ‘पूर्ण बहादुरको सारङ्गी’ले पाखा लगाएको थियो । यस्तो अवस्थामा ‘कंगुवा’को नेपालमा रिलिज असम्भव भएको हो ।
केही दिनदेखि ‘कंगुवा’लाई रिलिज नगरी भारत पठाइएको रकम अर्को चलचित्रमा प्रयोग गर्न भारतका वितरकसँग अनुरोध गरिएको जानकारी पनि प्राप्त भएको छ ।
तमिल भाषाको महाकाव्य फ्यान्टासी एक्सन चलचित्र ‘कंगुवा’लाई शिवाले निर्देशन गरेका हुन् । यसमा सुर्याले दोहोरो भूमिकामा अभिनय गरेका छन् भने बबी देओल, दिशा पटानी, योगी बाबु लगायतको पनि भूमिका रहेको छ ।