काठमाडौं । अभिनेत्री, नृत्याङ्गना तथा मोडल कविता नेपालीले ६११९ मिटर (२०,०७५ फिट) अग्लो माउन्ट लुबुचे सफल आरोहण गरेकी छन् । उनले आरोहणबारे फेसबुक मार्फत जानकारी दिँदै शिखरमा पुग्दा संसारलाई यसको वास्तविक स्वरूपमा देखेर आफूलाई धेरै सानो महसुस गरेको जनाएकी छन् ।
उनले बिहीबार आज बिहान ६:५४ मा माउन्ट लुबुचे पूर्वी शिखरमा आफ्नो पहिलो आरोहण सम्पन्न गरेकी हुन् । उनले यो आरोहणलाई एक विशेष अनुभव रहेको बताएकी छन् । केही तस्बिरहरू शेयर गर्दै उनले लेखेकी छन्, “शिखरमा पुग्दा संसारलाई यसको वास्तविक स्वरूपमा देखेर आफूलाई धेरै सानो महसुस गरेको छु । हावा, ढुङ्गा, र आकाशका तत्त्वहरूले जीवनका साना क्षणहरू र बीचको शान्तिलाई झल्काउँछन्।” उनले आफ्नो गाइड कर्मा शेर्पालाई सुरक्षित राख्ने, हिम्मत दिने, र पर्वतसँगको अद्वितीय ज्ञानको लागि धन्यवाद दिएकी छिन् ।
कविता एक कुशल नृत्याङ्गना र कोरियोग्राफर हुन्, जसले नेपाली नृत्य रियालिटी शो ‘बुगी वुगी’ को २०१८ संस्करणमा विजेता बनेकी थिइन् । कविताले चिनियाँ मार्सल आर्ट वुशुमा डिप्लोमा पनि पूरा गरेकी छिन् । उनले जुनियर राष्ट्रिय च्याम्पियनसिपमा स्वर्ण पदक र राष्ट्रिय च्याम्पियनसिपमा रजत पदक जितेकी छिन् ।
कविताले हालै मात्र चलचित्र ‘एक्लो’मा प्रमुख भूमिकामा छायाङ्कन सकाएकी थिइन् ।
