‘पूर्णबहादुरको सारङ्गी’को एक साताको व्यापार ८ करोड माथि

काठमाडौं । हलमा तहल्का मच्चाइरहेको नेपाली चलचित्र ‘पूर्ण बहादुरको सारङ्गी’ले एक हप्तामा नेपालभित्र मात्रै ८ करोड २५ लाख रुपैयाँ ग्रस कलेक्सन गरेको बताइएको छ । निर्माता विनोद पौडेलले सार्वजनिक गरेको रिपोर्ट अनुसार हाल यो चलचित्रले नेपालभरका ८९ हलहरूमा ३८० भन्दा बढी शोहरू प्राप्त गरेको छ ।

बिहान ६ बजेदेखि राति ११ बजेसम्म विभिन्न हलहरूमा प्रदर्शन भइरहँदा दर्शकहरूले यो चलचित्रलाई अत्यधिक माया दिएका छन् । यस चलचित्रको सफलताले नेपाली दर्शकहरूमा मात्र होइन, विदेशमा रहेका नेपाली समुदायमा पनि ठूलो उत्साह देखिएको छ । अमेरिका, अस्ट्रेलिया, युरोप, र खाडी मुलुकहरूमा पनि यस चलचित्रप्रति चासो बढिरहेको छ ।

‘पूर्ण बहादुरको सारङ्गी’लाई सरोज पौडेलले निर्देशन गरेका छन् भने विजय बराल, प्रकाश सपुत, अञ्जना बराइली, आलिशा बास्तोला, मुकुन भुसाल, र बुद्धि तामाङजस्ता कलाकारहरूको अभिनय रहेको छ । प्रशान्त सिवाकोटीको सङ्गीत, महेश दवाडीको पटकथा तथा संवाद रहेको छ ।