काठमाडौं। लोकप्रिय कमेडी शो ‘कमेडी नाइट विथ च्याम्पियन’ मङ्सिरको अन्त्यदेखि हिमालय टेलिभिजन र ओएसआर रियालिटी मार्फत प्रसारण हुने भएको छ। ‘कमेडी क्लब विथ च्याम्पियन’ को टिम अब नयाँ नाम ‘कमेडी नाइट विथ च्याम्पियन’ लिएर दर्शकमाझ आउने तयारीमा छ।
शोमा आबद्ध कलाकारहरूले कार्यक्रमको लोगो शेयर गर्दै यसको औपचारिक घोषणा गरेका छन्। यस शोको निर्देशन विशाल भण्डारीले गरेका छन्। यस सिजनमा सुमन कार्की, म्याक्सम गौडेल, सजन श्रेष्ठ, कैलाश कार्की, पवन भट्टराईसहित भरतमणि पौडेल, सन्तोष थापा, सुमन कोइराला, र प्रभात लामा समेत जोडिएका छन्।
कार्यक्रमको अध्यक्ष तथा निर्देशकको भूमिकामा दीपाश्री निरौला यथावत् रहेकी छन्। पहिलो सिजनमा दर्शकको मन जितेपछि दोस्रो सिजनलाई अझ भव्य र उत्कृष्ट बनाउन तयारी भइरहेको निर्देशक तथा होस्ट भण्डारीले जानकारी गराएका छन्।