काठमाडौं । प्रधानमन्त्री केपी शर्मा ओलीले फेसबुकमा पोस्ट गर्दै प्रदर्शनरत नेपाली चलचित्र ‘पूर्ण बहादुरको सारङ्गी’को प्रशंसा गरेका छन् । समय अभावले चलचित्र हेर्न नपाएको भए पनि समीक्षाबाट यो फिल्मले नेपाली समाजका परम्परा र व्यावसायिकताको अन्तरद्वन्द्वलाई प्रभावकारी रूपमा प्रस्तुत गरेको उनले उल्लेख गरेका छन् ।
“पूर्ण बहादुरको सारङ्गी चलचित्र हेर्न निम्तो आएको छ, तर समय अभावले हेर्न पाएको छैन । फिल्मको समीक्षा हेर्दा यसले हाम्रो सामाजिक परम्परा र व्यावसायिकताको अन्तरद्वन्द्वलाई राम्रोसँग उठाएको बुझेको छु । अनुकूलता मिले फिल्म हेर्ने छु,” ओलीले लेखेका छन् । साथै, उनले चलचित्रका निर्माता, निर्देशक र कलाकारहरूलाई बधाई पनि दिएका छन् ।
‘पूर्ण बहादुरको सारङ्गी’ कात्तिक १५ मा रिलिज भएको थियो र पाँच दिनमा ४ करोड ८७ लाखको व्यापार गरेको जनाइएको छ । सरोज पौडेल निर्देशित यो चलचित्रमा विजय बराल, अञ्जना बराइली, मुकुन भुसाल, प्रकाश सपुतलगायतका कलाकारहरूको अभिनय रहेको छ ।