काठमाडौं। प्रख्यात सङ्गीतकार र गायक हर्कुलस बस्नेत र ‘दि कुज’ ब्याण्डको संयुक्त प्रस्तुति रहेको गीत ‘मेरो अन्तिम माया’ हालै युट्युबमार्फत सार्वजनिक गरिएको छ। प्रेम भाव र समर्पणलाई चित्रण गर्ने यस गीतले प्रेम प्राप्तिको लागि गरिएको त्याग र प्रतीक्षालाई मार्मिक शब्दहरूमार्फत व्यक्त गर्दछ।
गीतमा स्वर र सङ्गीत हर्कुलस एन्ड ब्याण्डको रहेको छ भने यसको भावुक शब्द रचना उर्मिला गुरुङले गरेकी हुन्। हर्कुलसको दशक लामो साङ्गीतिक यात्राले उनलाई युवा पुस्तामा रुचाइएका सर्जकको रूपमा स्थापित गराएको छ। ‘जेरी’, ‘ड्रिम्स’, र ‘गाजलु’ जस्ता फिल्मका उनका गीतहरू करोडौँले मन पराएका छन्। मेलोडियस सङ्गीतका कारण उनका गीतहरूले श्रोतालाई मन्त्रमुग्ध बनाउन सफल भएका छन्।
गीतको मिक्सिङ र मास्टरिङ निश्चल भण्डारीले गरेका छन् भने छायाङ्कन र सम्पादन गौरव विष्टले गरेका छन्। ‘मेरो अन्तिम माया’को निर्माण अमेरिका निवासी दिलासा बस्नेतले गरेकी हुन्।