काठमाडौं। चलचित्र ‘तेल भिसा’को तेस्रो गीत ‘कति रमाइलो’ सार्वजनिक गरिएको छ। मंगलबार काठमाडौंमा आयोजित कार्यक्रममा सार्वजनिक गरिएको गीतमा वर्षा राउतको ‘बेबी सावर’मा भएको जमघट र नाचगान प्रस्तुत गरिएको छ। अमेरिकामा खिचिएको गीतमा अञ्जु पन्त र आशिष अविरलले गाएका छन्, एक नारायण भण्डारीको शब्द र आशिष अविरलको सङ्गीत रहेको छ।
गीतको भिडियोमा अमेरिकामा रहेका कलाकार दिलीप रायमाझी, सुशील क्षेत्री, अरुणिमा लम्साल लगायतका कलाकारहरूसँगै विपिन कार्की, पूजा चन्द, वर्षा राउत र ऋचा घिमिरे फिचर्ड छन्। कार्यक्रममा ऋचाले १० वर्षपछि नेपाली चलचित्र गर्न पाउँदा ऊर्जा महसुस भएको बताइन्। वर्षा राउत पनि चलचित्रको प्रचारका लागि नेपाल आएकी छन्।
चलचित्र मङ्सिर ७ गतेबाट प्रदर्शनमा आउने तयारीमा छ, जसमा बुद्धि तामाङ, सुचित्रा उप्रेती, फ्रान्सिस शेरमन लगायतका कलाकारहरूको पनि अभिनय छ। चलचित्रको निर्देशन शङ्कर घिमिरेले गरेका छन्।