काठमाडौं। सार्वजनिक स्थलहरूमा बजाइने गीत-सङ्गीतको रोयल्टी सङ्कलनलाई थप व्यवस्थित बनाउन ‘सङ्गीत रोयल्टी सङ्कलन अभियान’ सुरु भएको छ। सङ्गीत रोयल्टी सङ्कलन समाजले काठमाडौँ उपत्यकाबाट यो अभियानको सुरुवात गरेको हो, जसअन्तर्गत रेस्टुरेन्ट, विद्यालय, र सार्वजनिक यातायातजस्ता स्थलहरूलाई रोयल्टीको दायरामा ल्याउन हरियो र रातो स्टिकर टाँस्न थालिएको छ।
समाजका महासचिव बद्री पाण्डेका अनुसार, ‘गीत-सङ्गीत प्रयोग क्षेत्र’का लागि हरियो स्टिकर र ‘गीत-सङ्गीत निषेध क्षेत्र’का लागि रातो स्टिकर टाँस्ने अभियान सुरु गरिएको छ। यो पहलले सार्वजनिक स्थलमा बजाइने गीत-सङ्गीतको रोयल्टी सङ्कलनको मार्ग प्रशस्त गर्दै सर्जकहरूको अधिकारको संरक्षणमा योगदान पुर्याउने अपेक्षा गरिएको छ।
महासचिव पाण्डेले भने, “सार्वजनिक स्थलहरूमा बिना रोयल्टी सङ्गीत बजाउँदा सर्जकहरूको अधिकार हनन हुन्छ। यो अभियानले उनीहरूको श्रमको उचित मूल्य सुनिश्चित गर्न सहयोग पुर्याउनेछ।”
सङ्गीत रोयल्टी नतिरी गीत-सङ्गीत बजाएमा प्रतिलिपि अधिकार ऐन, २०५९ अनुसार कडा कानुनी कारबाहीको व्यवस्था गरिएको छ। रोयल्टी नतिरेको खण्डमा १० हजारदेखि एक लाख रुपैयाँसम्म जरिवाना वा ६ महिनासम्म कैद सजाय हुन सक्ने पाण्डेले बताए।
अभियानको पहिलो चरण काठमाडौँ उपत्यकाबाट सुरु भई देशभर फैलाउने योजना रहेको समाजले जनाएको छ।