काठमाडौं। नाट्यकर्मी, अभिनेता, निर्देशक तथा लेखक अनुप बरालले नेपाली दर्शकहरूको चलचित्र बुझाइलाई ‘लगभग शून्य फिल्म साक्षरता’ भएको टिप्पणी गरेका छन्। शनिवार साँझ फेसबुकमा एक पोस्टमार्फत उनले एक्काइसौँ शताब्दीमा पनि नेपाली दर्शकहरू परम्परागत र पुरानो शैलीका चलचित्रहरूमा मात्र रमाइरहेको उल्लेख गरेका छन्।
बरालले लेखेका छन्, “लगभग शून्य फिल्म साक्षरता भएको देश छ भने त्यो नेपाल हो। एक्काइसौँ शताब्दीमा आइपुग्दा पनि मध्ययुगीन शैलीको सिनेमा हेरेर मक्ख पर्ने आम दर्शक छन्।”
बरालको यो विचारले दसैँमा रिलिज भएका चलचित्रहरूले व्यावसायिक सफलता पाइरहेको समयमा नेपाली चलचित्र क्षेत्रको गम्भीर समीक्षा प्रस्तुत गरेको छ। हाल प्रदर्शनमा रहेका चलचित्रहरूको समीक्षागत दृष्टिकोणमा कम चर्चा भइरहँदा बरालको यो टिप्पणीले विशेष महत्त्व राख्छ।
उनको विचारले नेपाली चलचित्र उद्योगको विकासका लागि दर्शकहरूको रुचि र बुझाइमा सुधार आवश्यक रहेको सङ्केत गरेको छ। नेपाली रङ्गमञ्च र चलचित्रका बहु आयामिक व्यक्तित्व अनुप बरालले अभिनेता, लेखक, निर्देशक मात्र नभई एक अभिनय शिक्षकको रूपमा पनि आफ्नो प्रभाव जमाएका छन्।
बराल “एक्टर्स स्टुडियो नेपाल”का कलात्मक निर्देशक र “प्रतिबिम्ब थिएटर समूह”का संस्थापक निर्देशकका रूपमा नेपाली रङ्गमञ्चलाई नयाँ उचाइमा पुर्याउन महत्त्वपूर्ण भूमिका निभाउँदै आएका छन्। यद्यपि उनको करियर रङ्गमञ्चबाट सुरु भएको हो, उनले चलचित्र क्षेत्रमा पनि आफ्नो उपस्थिति सशक्त बनाएका छन्।