काठमाडौं। सलोन सलिना फिल्मस् प्रालिको ब्यानरमा निर्माण हुन लागेको चलचित्र ‘रङ्गी’ को स्क्रिप्ट पूजा सम्पन्न भएको छ। घटस्थापनाको अवसर पारेर बिहीबार काठमाडौंको कमलादीस्थित गणेशस्थान मन्दिरमा स्क्रिप्ट पूजाको कार्यक्रम आयोजना गरिएको थियो।
चलचित्रको प्रस्तुत कर्ता सलोन बस्नेत हुन्। यसको निर्देशन सुरेश न्यौपानेले गर्नेछन्, जसले यस फिल्ममार्फत निर्देशनमा डेब्यू गर्दैछन्। स्क्रिप्ट पूजामा सलोन बस्नेत, नम्रता श्रेष्ठ, निर्देशक सुरेश न्यौपानेलगायतको उपस्थिति थियो।
यसमा सलोन बस्नेत, नम्रता श्रेष्ठ, दिलीप रायमाझी, आरुषी कार्की, विशाल पहारी, र सुमिन गुरुङको अभिनय रहनेछ। चलचित्रको छायाङ्कन आगामी कार्तिक ५ गतेबाट सुरु हुने बताइएको छ।
निर्देशक सुरेश न्यौपानेले यसअघि ‘छक्का पन्जा’, ‘ए मेरो हजुर २’, ‘यात्रा’, ‘म यस्तो गीत गाउँछु २’, र ‘कृ’ जस्ता सफल चलचित्रहरूमा मुख्य सहायक निर्देशनको अनुभव बटुलेका छन्।
सक्षम सुवेदीको निर्माणमा बन्ने यस चलचित्रमा सुमन गजमेरको लेखन, सौरभ लामाको छायाङ्कन, दुर्गेश थापा, आमेश भण्डारी र भीम बिसीको सङ्गीत, कविराज गहतराज र शिशिर खातीको कोरियोग्राफी तथा केवलमान सिंह बस्नेतको प्रोडक्सन डिजाइन रहेको छ।