काठमाडौं। आसन्न फूलपातीको दिन अर्थात् असोज २४ गते तीन नेपाली चलचित्रहरू एकसाथ प्रदर्शनमा आउँदैछन्। यी चलचित्रहरूमा ‘छक्का पञ्जा ५’, ‘ज्वाइँ साब’ र ‘१२ गाउँ’ रहेका छन्। अहिले चलचित्र प्रदर्शन हुन करिब एक हप्ता मात्र बाँकी छ, तर यसबीच चलचित्र ‘१२ गाउँ’ले ट्रेलर सार्वजनिक गर्दै युट्युबमा नेपालकै नम्बर १ ट्रेन्डिङमा प्रवेश गरिसकेको छ।
तर, अन्य दुई चलचित्र ‘छक्का पञ्जा ५’ र ‘ज्वाइँ साब’ले भने अझैसम्म आफ्नो ट्रेलर सार्वजनिक गरेका छैनन्। ‘छक्का पञ्जा ५’का निर्माता एवम् मुख्य कलाकार दीपकराज गिरीले ट्रेलरको मिति अझै खुलाउन चाहेका छैनन्। ठुलोपर्दासँगको कुराकानीमा उनले हाल चलचित्रको काम जारी रहेको बताउँदै, ट्रेलर अन्तिम समयमा मात्र सार्वजनिक हुने जानकारी दिए।
त्यस्तै, ‘ज्वाइँ साब’का निर्देशक वसन्त निरौलाले भने भोली अर्थात् असोज १७ गते बिहीबार चलचित्रको ट्रेलर सार्वजनिक गर्ने तयारी भइरहेको जानकारी दिएका छन्। अब दुवै चलचित्रका ट्रेलर हेर्न दर्शकहरूलाई केही समय पर्खिनुपर्ने देखिन्छ।