काठमाडौं। गायक तथा सङ्गीतकार टङ्क बुढाथोकीले आफ्नो लोकप्रिय गीत ‘मन बिनाको धन ठूलो कि धन बिनाको मन’ शीर्षकमा फिल्म निर्माण गर्ने भएका छन् । आइतबार बुढाथोकीले चलचित्र विकास बोर्डमा यस चलचित्रको शीर्षक दर्ता गरेका हुन् ।
चलचित्र ‘मन बिनाको धन ठूलो कि धन बिनाको मन’ बुढाथोकीले निर्माण र निर्देशन गर्नेछन् । लक्ष्मी गिरि कार्यकारी निर्माताको भूमिकामा रहनेछिन् भने विनय अधिकारी सह-निर्माता हुनेछन् । यो चलचित्र सामाजिक कथामा आधारित हुने बताइएको छ ।
यस चलचित्रमार्फत बाल गायक अशोक दर्जी र एआर बुढाथोकीले नेपाली रजतपटमा डेब्यु गर्नेछन् । साथै, नव नायक रमेश बिकको पनि डेब्यु हुने भएको छ । निर्देशक टङ्क बुढाथोकीले बिकलाई चलचित्रमा अनुबन्ध गरेको जानकारी दिएका छन् । चलचित्रको कथा टङ्क स्वयंले लेखेका हुन् भने पटकथा र संवाद शिवम अधिकारीले तयार गरेका छन् ।
तिहारपछि छायाङ्कनमा जाने भनिएको चलचित्र ‘मन बिनाको धन ठूलो कि धन बिनाको मन’ का अन्य कलाकारहरू छिट्टै छनौट गरिने तयारी भइरहेको छ ।
फोटो: सुरेन्द्र थापा