काठमाडौं। नेपालको पहिलो फिल्म अध्ययन कलेज, अस्कर इन्टरनेसनल कलेज (कलेज अफ फिल्म स्टडिज)ले दोस्रो ‘युवा शर्ट फिल्म प्रतिस्पर्धा’को आह्वान गरेको छ । कलेजले सामाजिक सञ्जालमार्फत सार्वजनिक गरेको सूचनाअनुसार, यो प्रतिस्पर्धा २० वर्षमुनिका उमेर समूहलाई लक्षित गरिएको छ, जसमा सहभागीहरूले कार्तिक ५ गतेभित्र आफ्नो चलचित्र पठाइसक्नुपर्नेछ ।
कलेजका प्रधानाध्यापक रामराजा दाहालले फिल्म निर्माणमा उदीयमान प्रतिभाहरूको पहिचान गरी विशेष अवसर प्रदान गर्ने उद्देश्यले यो प्रतिस्पर्धा आयोजना गरिएको बताएका छन् । उनका अनुसार, “फिल्म अत्यन्त सिर्जनात्मक विधा हो, र युवाहरूको मस्तिष्क सृजनशील हुने भएकाले, हामीले युवालक्षित फिल्म निर्माण प्रतिस्पर्धा गरी उनीहरूलाई सहयोगसमेत गर्न पहल गरेका हौँ ।” उनले युवा फिल्ममेकरहरूमा विश्वास र लगानी गर्दा फिल्म क्षेत्रमा नयाँ पुस्ता तयार हुने विश्वास व्यक्त गरे ।
प्रतिस्पर्धामा ८ देखि १५ मिनेट अवधिका फिल्महरू छनोट गरिने छन्। प्रथम हुने फिल्मलाई १ लाख नगद पुरस्कार दिइनेछ भने दोस्रो र तेस्रो स्थानमा आउने फिल्महरूले क्रमशः ५० हजार र २५ हजार नगद पुरस्कार प्राप्त गर्नेछन् । साथै, प्रथम, द्वितीय, र तृतीय हुने फिल्ममेकरहरूले अस्कर कलेजमा भर्ना हुँदा ५० प्रतिशत छात्रवृत्तिको सुविधा पाउने छन् ।
त्यसै गरी, स्पेसल मेन्सनमा पर्न सफल फिल्ममेकरहरूले पनि कलेजमा भर्ना हुँदा ५० प्रतिशत छात्रवृत्ति पाउने व्यवस्था गरिएको छ । प्रतिस्पर्धाका विजेताहरूको घोषणा कार्तिक ९ गते गरिनेछ, र उनीहरूले निर्माण गरेका फिल्महरूको प्रदर्शनीसमेत गरिनेछ ।