काठमाडौं। यस वर्षको दसैँको अवसर पारेर असोज २४ गते फूलपातीको दिन रिलिज हुने नेपाली चलचित्र ‘ज्वाइँ साब’को नेपाल बाहिरका विभिन्न मुलुकको लागि प्रदर्शन अधिकार बिक्री भएको छ, जसमा अमेरिका, क्यानडा, युके, र जापान रहेको निर्माताले जनाएका छन् ।
अमेरिकाको लागि निर्देशक तथा सञ्चारकर्मी सुरेशदर्पण पोखरेलको माया डिजिटलले चलचित्रको प्रदर्शन अधिकार लिएको छ । अमेरिकामा अक्टोबर ११ (शुक्रवार) का दिन टेक्सास, क्यालिफोर्निया, न्यु योर्क, भर्जिनिया, मेरिल्यान्ड, कोलोराडो, न्यु हेम्प्शायरलगायतका सहरहरूमा १०० भन्दा बढी शोमार्फत प्रदर्शन गरिने पोखरेलले जनाएका छन् ।
वसन्त निरौलाले निर्देशन गरेको ‘ज्वाइँ साब’मा जितु नेपाल, नीति शाह, बुद्धि तामाङ, रमेश बुढाथोकी, शिशिर वाङ्देल, प्रकाश घिमिरे, निमा पाण्डे, हिमेश पन्त, शिवहरि वैरागी, राजेन्द्र नेपाली, कविता आले, शिवु पाण्डे, र ईशान राउत लगायतका कलाकारहरूको अभिनय रहेको छ ।
यसका प्रस्तुत कर्ता राजकुमार पण्डित हुन् भने, मिनादेवी खड्का, सौगात पण्डित, र पदमलाल तामाङले चलचित्रमा लगानी गरेका छन् । विजय बस्याल कार्यकारी निर्माता रहेका यस चलचित्रमा शङ्कर धितालको लेखन, सबिन अधिकारीको कथा, श्याम तामाङको छायाङ्कन, सञ्जय थापाको एक्सन, र अर्जुन पोखरेल तथा महेश ताम्राकारको सङ्गीत समावेश छ ।