काठमाडौं। बाल मनोविज्ञान, बाल अधिकार, तथा धनी र गरिब परिवारबीचको खाडलको विषयमा आधारित नेपाली चलचित्र ‘सारङ्ग’ को फर्स्ट लुक पोस्टर बिहीबार सार्वजनिक गरिएको छ । पोस्टरसँगै फिल्मको प्रदर्शन मिति पनि तोकिएको छ, जसअनुसार फिल्म ०७ मङ्सिरबाट देशव्यापी रूपमा प्रदर्शनमा आउनेछ ।
पोस्टरमा अभिनेत्री ऋचा शर्मा, अभिनेता उत्पल झा, बाल कलाकार सम्राट थापा र आदित्य कार्कीलाई प्रस्तुत गरिएको छ । यस चलचित्रलाई प्रशान्त तामाङले निर्देशन गरेका छन् । तामाङले नै चलचित्रको लेखन गरेका हुन् ।
‘सारङ्ग’ मा समीर मणि दीक्षित, सुरज तमु, मणि के. राई, अनिषा न्यौपाने, नीरज ब्ल्याक, दीपिका थापा, सुमन सागर जङ्ग केसी, विश्व स्याङ्वो, र प्रभातजंगको समेत अभिनय रहेको छ । दर्शन बुद्ध फिल्मस्को ब्यानरमा निर्माण गरिएको फिल्मका डिओपी गोपाल राय हुन्, भने सम्पादन मित्र ध्वज गुरुङले गरेका छन् ।
चलचित्रका गीत डिपी खनालले लेखेका छन्, र सङ्गीत शङ्कर थापा ‘स्माइल’ ले दिएका छन् । निर्देशक तामाङले फिल्मले सबै वर्गका दर्शकमाझ बेग्लै छाप छोड्ने विश्वास व्यक्त गरेका छन् ।