काठमाडौं। यही असोज १७ गते रिलिज हुने नेपाली चलचित्र ‘बेहुली फ्रम मेघौली’ले दर्शकहरूलाई विशेष अवसर प्रदान गरेको छ, जहाँ महिलाहरूले आफू बेहुली हुँदाको कथा लेखेर आकर्षक पुरस्कार जित्न सक्नेछन् ।
चलचित्रकी नायिका तथा निर्मात्री स्वस्तिमा खड्काका अनुसार उत्कृष्ट कथा लेख्ने व्यक्तिलाई चलचित्रको ग्राण्ड प्रिमियरमा निमन्त्रणा गरिनेछ, साथै दुई वटा टिकट पनि प्रदान गरिनेछ । “यो सुनौलो अवसरको फाइदा उठाइहाल्नुहोस्,” खड्काले भनिन् ।
कथामा सहभागी हुन चाहनेहरूले ३०० शब्दभित्र आफ्नो बेहुली हुँदाको अनुभव लेखी [email protected] वा [email protected] मा असोज १० गतेदेखि पठाउन सक्नेछन् ।
चलचित्रमा निश्चल बस्नेत, स्वस्तिमा खड्कासँगै वसुन्धरा भुसाल, विजय बराल, सिम्रन खड्का, लोकेन्द्र लेखक, रक्षा थापा, सिरु बिस्ट, आमिर गौतम, शिशिर सिवाकोटी, टीका पहारी, प्रभाकर शर्मा, लुनिभा तुलाधर, मुकुन्द मैनाली, र रामबाबु रेग्मीको अभिनय रहेको छ । ब्ल्याक हर्स पिक्चर्स र मेघौली फिल्मस्को ब्यानरमा निर्माण गरिएको यस चलचित्रमा सजन काफ्ले र आकाश बरालको लेखन तथा निर्देशन रहेको छ । चलचित्रमा कार्यकारी निर्मातामा फिरोज खड्का र शङ्कर पाण्डे रहेका छन् ।
अभिनेता विजय बराल कास्टिङ डिरेक्टरको भूमिकामा छन् भने, नरेन्द्र मैनालीले छायाङ्कन, प्रदीप लामा र केबिका खत्रीले कोरियोग्राफी, जयन जे वाइबा र कुशल पोखरेलले सङ्गीत, र निमेष श्रेष्ठले सम्पादनको जिम्मेवारी सम्हालेका छन् ।