काठमाडौं। नेपाली चलचित्र उद्योगले आगामी कार्तिक २२ गतेलाई लक्षित गर्दै हरर कमेडी शैलीको चलचित्र ‘फिरफिरे फिरिरि’ को फर्स्ट लुक पोस्टर सार्वजनिक गरेको छ । विन्ध्यवासिनी क्रियसनको ब्यानरमा निर्मित यस चलचित्रलाई मनोज कुमार अधिकारीले निर्माण गरेका हुन् । ‘नौ डाँडा पारी’ र ‘मङ्गलसूत्र’ जस्ता लोकप्रिय चलचित्रहरू निर्माण गरिसकेका निर्माता अधिकारी झन्डै १५ वर्षको अन्तरालपछि फेरि चलचित्र निर्माणमा सक्रिय भएका हुन् ।
उनले अब निरन्तर चलचित्र निर्माण गर्ने योजना बनाएको बताएका छन् । चलचित्रको लेखन सन्दीप श्रेष्ठ र नविन भट्टले गरेका छन् भने निर्देशन नविन भट्टको रहेको छ । निर्माण टिमले ‘फिरफिरे फिरिरि’ दर्शकलाई पूर्ण मनोरञ्जन प्रदान गर्ने विश्वास व्यक्त गरेको छ । यसै चलचित्रमार्फत सन्दीप श्रेष्ठ र भावना उप्रेतीले नेपाली चलचित्र उद्योगमा डेब्यु गर्दैछन् ।
सार्वजनिक पोस्टरमा चार जना पात्रहरूलाई प्रस्तुत गरिएको छ, जसमा स्कुटीमा बसेकी युवतीलाई तीन जना युवकहरूले तानातान गरिरहेको देख्न सकिन्छ । पोस्टरसँगै चलचित्रको रिलिज मिति पनि घोषणा गरिएको छ, जसअनुसार यो चलचित्र छठ पर्वको दिनदेखि प्रदर्शनमा आउनेछ । पोस्टरको डिजाइन अनन्त घिमिरेले गरेका हुन् ।
चलचित्रको शीर्षक ‘फिरफिरे फिरिरि’ पहेँलो रङ्गले हाइलाइट गरिएको छ, जसमा स्लोगन ‘आज साइकल… भोली फरारी’ लेखिएको छ । यस चलचित्रमा मनोज कुमार अधिकारी, सन्दीप श्रेष्ठ, भावना उप्रेती, शङ्कर सेढाई, पिटर प्रिन्स, रबिना केसी, पुष्प अवस्थी, र सूर्यमान लिम्बु लगायतका कलाकारहरूको अभिनय रहेको छ ।
चलचित्रको अन्य प्राविधिक पक्षमा जितु तामाङको छायाङ्कन, रोशन दास, प्रकाश दाहाल र अग्नि सुबेदीको सहायक निर्देशन, केशव राज भट्टको कोरियोग्राफी, एलिस कार्कीको ब्याकग्राउण्ड म्युजिक, प्रशान्त सिवाकोटीको सङ्गीत, अमित श्रेष्ठको साउन्ड डिजाइन, अनन्त घिमिरेको सम्पादन तथा कलर संयोजन रहेको छ । चलचित्रको वितरण आरआर फिल्मसले गर्नेछ ।