काठमाडौं। चर्चित बलिउड निर्देशक रोहित शेट्टीको महत्त्वाकाङ्क्षी चलचित्र सिंघम अगेन तिहारमा नै रिलिज हुने पक्का भएको छ। हालै आएका विभिन्न हल्लाहरूमा रिलिज मिति ढिलाइ हुने भनिए पनि, व्यापार विश्लेषक तरण आदर्शले सामाजिक सञ्जालमार्फत पुष्टि गरेका छन् कि चलचित्रलाई निर्धारित मिति कार्तिक १६ मा नै रिलिज गरिनेछ। आदर्शले आफ्नो पोस्टमा लेखेका छन्, “#SinghamAgain सारिँदै छैन… मिति फेरिँदै छैन… यो तिहारमा नै आउनेछ…”
सुरुदेखि नै दर्शकहरूको ध्यान तानेको सिंघम अगेन लाई प्रारम्भिक रूपमा स्वतन्त्रता दिवसको अवसरमा रिलिज गर्ने योजना थियो। तर, अजय देवगणले चलचित्रको काम नसकिएकाले यसलाई तिहारसम्म सारिएको जानकारी दिएका थिए। तर, भर्खरै आएको रिपोर्टमा चलचित्र ‘भूल भुलैया ३’ सँगको सम्भावित भिडन्तका कारण पुनः रिलिज मिति ढिलाइ हुने हल्ला चलेको थियो। तर, निर्माताहरूले यी हल्लाहरूको खण्डन गर्दै चलचित्रलाई तिहारमा नै दर्शकमाझ ल्याउने निर्णय गरेका छन्।
सिंघम अगेन मा अजय देवगण र करिना कपुर खान प्रमुख भूमिकामा रहेका छन्। साथै, अर्जुन कपुरलाई पहिलो पटक मुख्य खलनायकको रूपमा देख्न सकिनेछ। चलचित्रमा रोहित शेट्टीको ‘कपभर्स’लाई थप बिशेष बनाउन रणवीर सिंह (सिम्बा), अक्षय कुमार (सूर्यवंशी), दीपिका पादुकोण (लेडी सिंघम), र टाइगर श्राफ (ACP सत्य) को विशेष भूमिकाहरू रहेका छन्। यस चलचित्रले नयाँ पात्रहरूलाई प्रस्तुत गर्दै ‘कपभर्स’ लाई थप विस्तार गर्ने लक्ष्य राखेको छ।
दर्शकहरूले अत्यधिक अपेक्षा राखेको यो चलचित्रसँगै तिहारमा भयानक भिडन्त पनि देख्न सकिन्छ, किनकि भूल भुलैया ३ पनि तिहारमा नै रिलिज हुँदैछ। कार्तिक आर्यन, विद्या बालन, र तृप्ती डिमरीको मुख्य भूमिका रहेको यो चलचित्रले पनि दर्शकहरूबीच ठुलो उत्साह जगाइरहेको छ।