काठमाडौं। मङ्गलवार नेपाली चलचित्र ‘केटी हराएको सूचना’को टिजर सार्वजनिक गरिएको छ। करिब एक मिनेट लामो टिजरले चलचित्रको कथा र विषयवस्तुमा प्रकाश पार्दछ।
टिजरमा नाजिर हुसेन र सृष्टि श्रेष्ठबिचको प्रेम सम्बन्ध देखाइएको छ, जसले अन्त्यमा सृष्टिलाई नाजिरले बन्धक बनाएको दृश्यमा पुगेर टुङ्गिन्छ। टिजरले चलचित्र धोका र बदलाको कथामा आधारित रहेको सङ्केत गर्दछ।
यस चलचित्रको प्रदर्शन मिति कात्तिक ३० गतेका लागि तय गरिएको छ। सोही दिन अभिनेता निता ढुङ्गाना र हरिहर अधिकारीको निर्माण तथा अभिनय रहेको चलचित्र ‘ह्रस्व दीर्घ’ र अभिनेता सौगात मल्ल स्टारर चलचित्र ‘बम बहादुर’ पनि प्रदर्शनमा आउँदै छन्।
‘केटी हराएको सूचना’को निर्देशन डकु–ड्रामा ‘उजेली’का निर्देशक दीपेन्द्र गौचनले गरेका हुन्। चलचित्रमा नाजिर र सृष्टिसँगै सञ्जय गुप्ता, राम नारायण ठाकुर, मदन ठाकुर, रिना रिमाल, र ललिता देवी मिश्रको पनि अभिनय रहेको छ। नकिम उद्दिन कार्यकारी निर्माता रहेको चलचित्रमा दीपेन्द्र गौचनले स्वयं स्क्रिप्ट लेखन गरेका छन् भने छायाङ्कन अमर महर्जनले गरेका छन्।
टिजर: