काठमाडौं। अनमोल केसीको अभिनय रहने फिल्म ‘जेरी अन टप’मा चर्चित कथा वाचक साइग्रेस पोखरेलको संलग्नता भएको छ। बताइए अनुसार, पोखरेल ‘क्रिएटिभ राइटर’ भूमिकामा अनुबन्धित भएका छन् र फिल्मको पटकथा र संवादलाई थप प्रभावकारी बनाउन सहयोग गर्नेछन्। पोखरेलले फेसबुकमा अनमोलसँगको तस्बिर शेयर गर्दै फिल्ममा जोडिएको जानकारी दिएका छन्।
पोखरेल पोर्चुगलमा बसोबास गर्दै आएका छन्। उनले यसअघि ‘अधुरो प्रेम’ नामक आफ्नै कथामा आधारित रहेर फिल्म बनाउने घोषणा गरेका थिए। तर, सो फिल्म कहिले रिलिज हुन्छ भन्ने जानकारी भने प्राप्त भएको छैन।
सुयोग गुरुङको निर्देशनमा निर्माण हुने ‘जेरी अन टप’ केही दिनमै छायाङ्कनमा जान लागेको छ। यो फिल्मको छायाङ्कन काठमाडौं, लुक्ला र भारतको लद्दाखमा हुने तय भएको छ। यस फिल्ममा अनमोलसँगै आँचल शर्मा र जसिता गुरुङको मुख्य भूमिका रहनेछ।
फिल्म ‘जेरी अन टप’ भ्यालेन्टाइन्स डेको अवसरमा आगामी फागुन २ गते रिलिज हुने तय भएको छ। फिल्मले अनमोल केसीको नयाँ र रोमाञ्चक भूमिकालाई प्रस्तुत गर्ने अपेक्षा गरिएको छ। साइग्रेस पोखरेलको संलग्नताले यस फिल्मलाई अझै उत्कृष्ट बनाउने विश्वास लिइएको छ।