आज विश्व सङ्गीत दिवस: सङ्गीतको उत्सव र एकताको दिवस

विश्व सङ्गीत दिवसको मूल उद्देश्य सङ्गीतको महत्त्वलाई प्रचार गर्नु र गीत सङ्गीतमा जीवन बिताइरहेका प्रतिभाहरूलाई प्रोत्साहित गर्नु हो। यस अवसरमा संसारभर विभिन्न किसिमका साङ्गीतिक कार्यक्रमहरू, निःशुल्क कन्सर्ट, सङ्गीत कार्यशाला, र सङ्गीत प्रतियोगिताहरू आयोजना गरिन्छन्। विश्वभरिका सहरहरूमा सार्वजनिक स्थानहरूमा कलाकारहरूले आफ्नो प्रतिभा प्रस्तुत गर्ने अवसर पाउँछन्, जसले सबै उमेरका मानिसहरूलाई सङ्गीतको माध्यमबाट एकताबद्ध गर्छ।

नेपालमा पनि यो दिवस विभिन्न कार्यक्रमहरू आयोजना गरेर मनाइने गरिएको छ। नेपालका सङ्गीत सम्बद्ध विभिन्न सङ्घ संस्थाहरूले शुक्रवार विभिन्न कार्यक्रमहरू आयोजना गरेका छन्।

विश्व सङ्गीत दिवसले सङ्गीतको महत्त्वलाई व्यापक बनाएको छ र विभिन्न संस्कृति र पृष्ठभूमिका मानिसहरूलाई एकसाथ ल्याएको छ। सङ्गीतलाई सम्मान दिनु र यसको माध्यमबाट समाजमा सद्भावना फैलाउनु दिवसको प्रमुख उद्देश्य हो।