आफैले मृत्युको खबर फैलाएकी मोडल पुनमलाई कारबाही गर्न माग

भारतीय नायिका–मोडल पुनम पाण्डेले आफ्नो मृत्युको झुटो समाचार आफैले फैलाएर सबैलाई चकित बनाइन् । शुक्रवार उनी आफैले सोसल मिडियामा पाठेघरको मुखको क्यान्सरका कारण मृत्यु भएको खबर फैलाएकी थिइन् । शनिवार एक भिडियो शेयर गर्दै उनले आफू जीवितै रहेको बताइन् । शनिवार उनले जनतालाई सचेत गराउनको लागि उनले आफ्नो मृत्युको खबर फैलाएको बताएपछि भारतमा उनको व्यापक विरोध भइरहेको छ ।

पुनमको यो पूरै ड्रामामा धेरै सेलेब्सको प्रतिक्रिया आएको छ । फिल्म निर्देशक विवेक अग्निहोत्रीदेखि अभिनेत्री कुशा कपिलाले यसको निन्दा गरेका छन् । ‘द कश्मीर फाइल्स’ फेम निर्देशक विवेक अग्निहोत्रीले ट्विट सेयर गर्दै लेखेका छन्, ‘सोसल मिडियाको बढ्दो चुनौतीलाई हेरेर यहाँ पनि केही नियमहरू हुनुपर्छ भन्ने मलाई लाग्छ । विशेष गरी समाचार निर्माताहरू र आफूलाई प्रभावकारी भनाउनेहरूका लागि । यो सनसनी र नौटङ्की सामान्य बनाउन खतरनाक छ। मृत्युको झुटो समाचार त सुरुवात मात्र हो । अब के हुन्छ हेरौँ (केवल पर्खनुहोस् र हेर्नुहोस्)।’

चलचित्र निर्माता अशोक पण्डितले एक भिडियो शेयर गर्दै अभिनेत्रीले धेरैको भावनामा खेलबाड गरेको बताएका छन् । उनले पुनमको कर्तुतले पाठेघरको मुखको क्यान्सरसँग लडिरहेका सबैको खिल्ली उडाएको बताएका छन् । ‘सिङ्गो देशलाई झुटो बोलेर यो नाटक रचेको अभियन्ता विरुद्ध मुद्दा दर्ता गर्न सरकारका सबै कानुनी निकायलाई आग्रह गर्दछु । यस घटनामा संलग्न पिआर एजेन्सीलाई पनि कारबाही हुनुपर्छ’, उनले भनेका छन् ।

पुनमको पोस्टमा कमेन्ट गर्दै एकता कपूरले पनि लेखेकी छिन्, ‘यो सचेतना भनेको कुन खोप लिनु हुँदैन भन्ने हो । यस्तो असंवेदनशील अभियानलाई प्रोत्साहन गर्ने कम्पनीलाई कारबाही गर्नुपर्छ ।’

उता पुनमको यो भद्दा मजाकलाई लिएर भारतका जनताले पनि व्यापक विरोध गरेका छन् । एक सामाजिक सञ्जाल प्रयोगकर्ताले कमेन्ट गर्दै लेखे, ‘सचेत बनाउने तरिका अलि अनौपचारिक छ।’ अर्को प्रयोगकर्ताले टिप्पणी गरे, ‘तपाईँले आफ्नो दिमागको लागि पनि प्लास्टिक सर्जरी गराउनुपर्छ।’