काठमाडौँ।
अभिनेत्री वर्षा राउतले काठमाण्डौँको चोभार स्थित मञ्जुश्री पार्कमा सञ्चालनमा ल्याइएको नेपालको पहिलो क्यानोपी जिप लाइनको मज्जा लिएकी छन् । सो जिपलाईनको उद्घाटनको लागि पुगेकी उनले दश मिनेट खेल्न समय लाग्ने करिब ४ सय मिटरको क्यानोपी खेलिन् ।
राउतले जिप लाइनको अनुभव पहिले एक पटक लिएको तर रोकी रोकी फरक फरक स्टेसनमा फरक फरक एडभेन्चर क्यानोपी खेल्दा भने बेग्लै मज्जा आएको प्रतिक्रिया दिइन् । चलचित्र छायाङ्कनको क्षेत्रमा भएको कारण यसले थप माइलेज पाउने उनले बताइन् ।
चार करोड लगानीमा निर्मित क्यानोपी जिप लाइनलाई जे.बी एडभेन्चरले सञ्चालनमा ल्याएको हो । प्रविधिका हिसाबले जापानी प्रविधि र नेपालकै प्रख्यात विज्ञहरूबाट सञ्चालनमा ल्याएको र सुरक्षाको हिसाबले पनि नमुना रहेको दाबी कम्पनीले गरेको छ ।