काठमाडौँ।
कलाकार तथा निर्मात्री प्रज्ञा जोशीले पुनः टेलिसिरियल सिन्दूर निर्माण गर्ने भएकी छन् । शुक्रवार भद्रकाली मन्दिरमा शुभ मुहूर्त गर्दै उनले यसको निर्माण घोषणा गरेकी छन् ।
करिब १७ वर्ष अगाडी नेपाल टेलिभिजनबाट प्रसारण भई सुपर हिट भएको सो टेलिसिरियललाई अहिलेको पुस्ताको स्वादअनुसार पुनः बनाउन लागेको जोशीले बताइन् ।
प्रज्ञा फिल्मस्को ब्यानरमा निर्माण हुने टेलिसिरियलमा नवीन श्रेष्ठ, प्रज्ञा जोशी, लक्ष्मी भुसाल, प्रदीपराज गिरी, अश्मी थापा, दीपेन्द्र सोनाम, स्नेहा पौडेल, पूर्णिमा जिएम, टेकेन्द्र न्यौपाने, पवन केसी लगायतका कलाकारको अभिनय रहनेछ ।
थुप्रै चलचित्रहरूका मुख्य सहायक निर्देशक भएर काम गरेका विनय पौडेलले निर्देशन गर्ने यो सिरियलमा मदन कश्यप घिमिरेको छायाङ्कन, लय सङ्ग्रौलाको गीत लेखन, सम्राट थापाको सङ्गीत रहनेछ ।