काठमाडौँ।
अभिनेता प्रदीप खड्काको नेपाली, हिन्दी, अङ्ग्रेजी र तमिल भाषामा बन्न लागेको नयाँ चलचित्र ‘ऐरी’ घोषणा गरिएको छ । मङ्गलवार मोशन पोस्टर सार्वजनिक गर्दै जीवन थापाले निर्देशन गर्ने यो चलचित्र घोषणा गरिएको हो । पोस्टरमा प्रदीपलाई सिकारी अवतारमा राखिएको छ ।
![](https://i0.wp.com/www.thuloparda.com/wp-content/uploads/2023/11/POSTER_FRONT.jpg?resize=582%2C768&ssl=1)
शिरमा गुथेको फेटामा खुकुरी सिउरिएका उनी लामो कपालसहित छन् । पृष्ठभूमिमा बाघ छ । मोशन पोस्टरको अन्तिममा उनले खुकुरी प्रहार गरेका छन् ।
सन् २०२४ मा रिलिजको तयारी गरिएको सो चलचित्रको मोशन पोस्टर सार्वजनिक गर्दै खड्काले यो चलचित्र आफ्नो लागि मात्र नभई नेपाली चलचित्रकर्मीहरूका लागि पनि खुसी रहेको बताए ।
खड्काले यस चलचित्रको सफलतासँग समग्र नेपाली चलचित्र उद्योगको हित हुने बताए । हाल मुम्बईमा रहेका उनले ठुलोपर्दासँग कुरा गर्दै ठुलो विदेशी लगानीसहित यो चलचित्र बन्न लागेको जनाए ।
यो चलचित्र भारतीय निर्माता द्वय सुवास काले र प्रशान्तकुमार गुप्ता तथा नेपाली निर्माता राजन कुँवरले संयुक्त निर्माण गर्नेछन् । सुवासले प्रदीपको चलचित्र ‘प्रेम गीत ३’लाई हिन्दी भाषामा भारतका हलमा प्रदर्शन गरेका थिए ।
फागुनपछि छायाङ्कनमा जाने यो चलचित्रको छायाङ्कन धेरैजसो नेपालमा नै हुनेछ भने प्राविधिकहरू पनि नेपाली नै हुने बताइएको छ ।
मोशन पोस्टर हेर्नुहोस्: