काठमाडौँ।
केही समय अघि अर्जुन पोखरेलको गीत ‘मेसो मिलाएर’ सुपर हिट भएपछि अभिनेता राज कटुवाल पनि चर्चामा आए । अन्य केही भिडियो र चलचित्रमा अभिनय गरेको भए तापनि सो म्युजिक भिडियो राजलाई चिनाउने म्युजिक भिडियो बन्यो । राजले सो भिडियोमा अभिनेत्री श्रद्धा क्षेत्रीसँग अभिनय गरेका थिए ।
यसैबिच सङ्गीतकार पोखरेलले कटुवालसँग पाँच वटा म्युजिक भिडियोको लागि लिखित सम्झौता गरेका छन् । सम्झौता अनुसार अर्जुनको कम्पनी द डिभाइन म्युजिकले तयार पार्ने पाँच वटा भिडियोमा राजले काम गर्नुपर्नेछ । सम्झौता पत्रमा हस्ताक्षर गर्दै दुवैले उत्साह व्यक्त गरेका छन् ।
डिभाइनको भिडियोमा काम गर्न पाउँदा आफू उत्साहित भएको राजले बताए । यस्तै, सङ्गीतकार पोखरेलले ‘मेसो मिलाएर’ गीत हिट भएपछि राजलाई दर्शकले अत्यधिक खोजेकाले आफूले सो सम्झौता गरेको बताए ।
राजले निर्माण गरिरहेको फिल्म ‘मायावी’को हाल छायाङ्कन भइरहेको छ । राज आफै नायक बनेर नयाँ फिल्ममा काम गर्ने तयारीमा समेत छन् ।