काठमाडौँ।
नेपाली चलचित्रका निर्माता तथा कलाकार किरण नेपाली सडक दुर्घटनामा परी घाइते भएका छन् । व्यक्तिगत कामले सिन्धुली पुगेर काठमाडौँ फर्किने क्रममा आइतबार साँझ ५ बजे सिन्धुलीको चौकिटारमा उनी सवार कार दुर्घटनामा परेको थियो ।
दुर्घटनामा परी नेपालीको ढाडमा चोट लागेको छ । हाल उनको नेशनल ट्रमा सेन्टरमा उपचार भइरहेको छ । सोमबार चिकित्सकले थप परीक्षण गरेपछि सर्जरी गर्नु पर्ने या नपर्ने यकिन हुने नेपालीले बताए ।
नेपालीको निजी कार उनका व्यावसायिक साझेदार राजु थापा मगरले चलाइरहेका थिए । राजु भने सामान्य उपचारपछि घर फर्किसकेका छन् । दुर्घटना पछि मगर र नेपालीलाई राती ९ बजे एम्बुलेन्समार्फत ट्रमा सेन्टर पुर्याइएको थियो ।
बनाइरहेको बाटोमा ढुङ्गा छल्ने क्रममा कार सडकबाट ५० मिटर तल खसेको निर्माता नेपालीले बताए । दुर्घटनाबाट कारमा पनि ठुलो क्षति पुगेको छ ।