काठमाडौँ।हास्यव्यङ्ग्य कलाकार तथा गायक राजा राजेन्द्र पोखरेलले आफ्नो जन्मदिनको अवसर पारेर नयाँ गीत ‘सालको पात’ सार्वजनिक गरेका छन् । जन्मदिनमा केही शुभ काम गर्ने उद्देश्यले उनले मङ्गलवार गीत सार्वजनिक गरेका हुन् ।
व्यावसायिक रूपमा हास्य कलाकार हुनुअघि नै राजा राजेन्द्रले केही गीत सार्वजनिक गरेका थिए । तर समयको मागअनुसार उनले आफूलाई हास्य कलाकारको रूपमा पनि निखार्दै लगे र व्यावसायिक रूपमा अघि बढेका थिए ।
‘सालको पात’ गीतमा वैदेशिक रोजगारीको कथालाई उठान गरिएको छ । यसमा अभिनेत्री शिल्पा पोखरेलले साउदीको जेलमा परेका श्रीमानलाई झिकाउन सक्दो प्रयास गरिरहेकी श्रीमतीको भूमिका निर्वाह गरेकी छिन् ।
ज्ञानेन्द्र शर्मा हुमागाईँको निर्देशन रहेको यसै गीतमार्फत कलाकार युवराज गौतमले डेब्यु गरेका छन् । कलाकार सुरवीर पण्डित अर्थात् ‘दाह्री बा’ र बाल कलाकार एलेक्श खड्का पनि मुख्य कलाकारको रूपमा रहेका छन् ।
राजा राजेन्द्रको आवाज रहेको यस गीतमा श्रमदीप चौलागाईँको शब्द र सङ्गीत रहेको छ । भिडियो दिन्सन शाहले सम्पादन गरेका हुन् ।
राजा राजेन्द्रका ‘टेबल फ्यान’, ‘पिरतीको चस्मा’, ‘लोकल नभई हुँदैन’ जस्ता गीतहरू चर्चित छन् ।
गीत हेर्नुहोस्: