नवलपुर जिल्ला अदालतले बाल यौन दुरुपयोगको मुद्दामा दोषी ठहर गर्दै जेल सजाय सुनाएपछि तनहुँ जिल्ला कारागारमा रहेका अभिनेता पल शाहले अदालतको आदेशविरुद्ध उच्च अदालत पोखरामा पुनरावेदन गरेका छन् । शुक्रवार शाहका अधिवक्ता कमलामोहन वाग्लेले नवलपुर जिल्ला अदालतको आदेश उल्टाएर सफाई दिन माग गर्दै निवेदन दर्ता गराएका हुन् ।
यसअघि पनि तनहुँ र नवलपुर अदालतले पुर्पक्षका लागि थुनामा राख्न आदेश दिएपछि पलले उच्च अदालत पोखरामा पुनरावेदन चढाएका थिए । तर, उच्च अदालतले पनि जिल्ला अदालतकै फैसलालाई सदर गरेको थियो । नवलपुर जिल्ला अदालतले शाहलाई सजाय सुनाए पनि तनहुँ जिल्ला अदालतमा भने मुद्धा अड्किएर बसेको छ । शाहले करिब ९ महिनादेखि कारागार जीवन विताइरहेका छन् ।
गत भदौ २१ गते शाहलाई नवलपुर जिल्ला अदालतले बालयौन दुरुपयोगमा दोषी ठहर गर्दै साढे दुई वर्ष कैद, २५ हजार रुपैयाँ जरिवाना र पीडितलाई १० लाख रुपैयाँ क्षतिपूर्तिको फैसला सुनाएको थियो । न्यायाधीश यज्ञप्रसाद आचार्यको इजलासले बलात्कार पुष्टि नभएपनि यौनजन्य अस्वभाविक व्यवहार देखाएको ठहर गरेको थियो ।