आगामी भदौ ३ गतेलाई प्रदर्शन मिति घोषणा गरेको चलचित्र ‘प्रेमगन्ज’को आइटम गीत सार्वजनिक भएको छ । मंगलवार राजधानीमा एक कार्यक्रमका बीच सार्वजनिक गरिएको ‘तरबार’ बोलको गीतमा अभिनेत्री बेनिशा हमाल बोल्ड अवतारमा प्रस्तुत छिन् । उनले पहिलो पटक चलचित्रमा आइटम गीतमा नृत्य गरेकी हुन् । गीतमा उनले आकर्षक नृत्य प्रस्तुत गरेकी छन् ।
पुरुषोत्तम ढुंगेलको शब्द र किरण भुषालको संगीत रहेको गीतमा दिक्षा थापा र सुरज शाही ठकुरीको स्वर छ । गीतको भिडियोमा संजय लामाको छायांकन र द वाइल्ड रिपर्ज क्रुको कोरियोग्राफी छ । चलचित्रमा बेनिशाका अलावा सुरक्षा पन्त, तेज गिरी, राइडर प्रशान्त, सिमरन खड्का, नरेश पौडेल, रश्मी भट्ट, सञ्जोग रसाइली, गीता अधिकारी, सम्पदा बानियाँ, पबन भट्टराई, सुप्रिया खनाललगायतका कलाकारको पनि अभिनय छ ।
चलचित्रलाई परिच्छेद सेनले निर्देशन गरेका हुन् । अनन्तमान श्रेष्ठ कार्यकारी निर्माता रहेको चलचित्रको कथा तथा पटकथा निर्देशक सेन आफैंले लेखेका हुन् । अर्जुन जिसीले सम्पादन गरेको चलचित्रको निर्मातामा किरण गुरागाईं, रेश्मा थापा, राजेश सुवाल, गणेश भण्डारी र निर्मला लामिछाने छन् । राजु फुयाँलको प्रस्तुतिमा चलचित्र चौतारीको ब्यानरमा चलचित्र बनेको हो ।