पाँच दिनमै ‘सूर्यवंशी’ को कमाई सय करोड नाघ्यो

कोरोनाका कारण हलसम्म जान डराएका दर्शकलाई बलिउड चलचित्र ‘सूर्यवंशी’ ले हलसम्म फर्काएको छ । यो चलचित्र हेर्न नेपालका हलमा समेत दर्शक भरिभराउ छन् । यही कार्तिक १९ गतेबाट प्रदर्शनमा आएको चलचित्रले भारतीय बक्सअफिसमा कमाईको मामलामा रेकर्ड नै बनाएको छ । चलचित्रले प्रदर्शनको पाँच दिनमा सय करोडको आँकडा पार गर्न सफल भएको छ ।

पहिलो दिन २६ करोड २९ लाख, दोस्रो दिन २३ करोड ८५ लाख, तेस्रो दिन २६ करोड ९४ लाख, चौंथो दिन १४ करोड ५१ लाख र पाँचौ दिन ११ करोड २२ लाख कमाउँदै चलचित्रले पाँच दिनमा १ सय २ करोड ८१ लाख कमाउन सफल भएको ट्रेड एनालिस्ट तरण आदर्शले जानकारी दिएका छन् । कोरोना महामारीपछि भारतमै सय करोडको व्यापार गर्ने ‘सूर्यवंशी’ पहिलो चलचित्र बनेको छ ।

यो चलचित्रले नेपालमा समेत आक्रामक व्यापार गरिरहेको छ । नेपालमा यो चलचित्रले पाँच दिनमा ३ करोडको नजिक व्यापार गरेको जानकारी प्राप्त छ । रोहित शेट्टी निर्देशित यस चलचित्रमा अक्षय कुमार, कटरीना कैफ, अजय देवगन, रणवीर सिंहको अभिनय छ । चलचित्रमा अक्षयको अभिनय र एक्सनलाई दर्शकले निकै रुचाएका छन् । चलचित्रले भारतमै २ करोड छाप्ने अनुमान गरिएको छ ।