चर्चित गायक सनुप पौडेलको स्वरमा रहेको ‘खुसी’ बोलको गीत सार्वजनिक भएको छ । दीपक जडितको शब्द रचना रहेको गीतमा गायक पौडेल स्वयंले संगीत भरेका छन् । बिहीवार राजधानीमा आयोजित एक कार्यक्रमका बीच सार्वजनिक गरिएको गीतको भिडियोमा सुनिता दर्नाल र सुरज मल्लका साथै गायक पौडेलको पनि अभिनय छ ।
सनुप पौडेलको यूट्युब च्यानलबाट सार्वजनिक भएको गीतको भिडियो कलात्मक छ । पछिल्लो समय बनिरहेका भिडियोभन्दा फरक शैलीमा तयार गरिएको भिडियोलाई प्रनव केसीले निर्देशन गरेका हुन् । उनी निर्देशित यो पहिलो म्यूजिक भिडियो हो । उनले पहिलो प्रयासमै राम्रो सम्भावना देखाएका छन् ।
विवेक बजुको छायांकन, रोशन खत्रीको सम्पादन, प्रनव केसी, श्रृजन भट्टराई, सुनिता दर्नाल र सुरज मल्लको कोरियोग्राफी रहेको भिडियोमा सन्जिव रत्न शाक्यको कलर छ । अघिल्लो लकडाउनमा यो गीतको अडियो तयार भएको थियो भने दोस्रो लकडाउनमा भिडियो निर्माण गरिएको हो ।