‘सत्यनारायणकी कथा’ गर्दै कार्तिक

धर्मा प्रोडक्शनको ‘दोस्ताना २’ र रेड चिल्ली इन्टरटेन्मेन्टको चलचित्र ‘फ्रेडी’ बाट बाहिरिएपछि अभिनेता कार्तिक आर्यनको करिअर संकटमा परेको चर्चा चलिरहँदा उनले नयाँ चलचित्र साइन गरेका छन् । उनले बुधवार चलचित्र ‘सत्यनारायणकी कथा’ साइन गरेका हुन् । साजिद नाडियाडवाला र नमह पिक्चर्सले निर्माण गर्ने चलचित्रलाई समिर विद्यवानले निर्देशन गर्नेछन् ।

नाडियाडवालाले पहिलो पटक कार्तिकसँग सहकार्य गर्न लागेका हुन् । यो चलचित्रलाई म्यूजिकल लभ स्टोरी कथामा बनाउने तयारी गरिएको छ । सामाजिक सञ्जालमा चलचित्रको बारेमा जानकारी दिँदै कार्तिकले लेखेका छन्, ‘मेरो दिलको करीब एक कहानी ‘सत्यनारायणकी कथा’ । विशेष व्यक्तिसँग एक विशेष चलचित्र ।’ उनी चलचित्रमा काम गन निकै उत्साहित देखिएका छन् ।

त्यस्तै, निर्माता साजिद नाडियाडवालाले यो चलचित्र कार्तिक आर्यनको महाकाव्य प्रेम-गाथा हुने बताएका छन् । चलचित्रका लागि अन्य कलाकार पक्का गरिएको छैन । यो चलचित्र कार्तिकको करिअरको सबैभन्दा अलग हुने भारतीय मिडियाले बताएका छन् । एकपछि अर्को सफल चलचित्रमा काम गरिरहेका उनीमाथि अहिले बलिउड निर्माताले करोडौंको लगानी गरिरहेका छन् ।