सुनसरी जिल्लाको सदरमुकाम इनरुवाको पर्यटकीय प्रवद्र्धन गर्ने उदेश्यका साथ गायक, संगीतकार तथा रचनाकार उमेश रेग्मीले डेढ दशकअघि नै आफ्नो गृहनगर इनरुवाप्रति समर्पित गर्दै ‘सुनसरी इनरुवा’ एल्बम सार्वजनिक गरेका थिए । त्यही एल्बमको शीर्ष गीतको रिमेक भर्सनमा सार्वजनिक गरिएको छ ।
उमेशको शब्द र संगीतमा गायक रामकृष्ण ढकाल र मेलिना राईको स्वरमा रिमेक भर्सन सार्वजनिक भएको हो । गीतका शब्दहरुमा इनरुवा र आसपासका विभिन्न धार्मिक तथा पर्यटकीयस्थलहरुको वर्णनसँगै माया–प्रेमका भावना व्यक्त गरिएको छ भने भिडियोमा इनरुवा बजारसहित रामधुनी, देवीथान, लाटी माई, कंश मरण लगायतका मठ मन्दिरहरुको दृश्य समवेश गरिएको छ ।
भिडियोलाई जीवन्त बनाउन उमेशले कलाकारहरुको टोलीलाई नै इनरुवा उतारेर छायांकन गरेका थिए । भिडियोमा गायक रामकृष्ण ढकाल र नायिका रिमा विश्वकर्माले अभिनय गरेका छन् । युवराज वाईबाको निर्देशन रहेको भिडियोको छायांकन निलास पौडेलले र सम्पादन विकास दाहालले गरेका हुन् ।
गीतको एरेञ्ज महाराज थापाले गरेका हुन् । गोत्र इन्टरटेनमेन्ट च्यानलबाट भिडियो सार्वजनिक भएको हो । हाल अमेरिकामा रहेका उमेशले एकपछि अर्को नयाँ गीत सार्वजनिक गरिरहेका छन् । यसअघि उनले ‘बाबाको दुई पैसे जागिर’ बोलको गीत सार्वजनिक गरेका थिए । दर्शक/स्रोताले उक्त गीत र भिडियो मन पराएका थिए । उनी आफैं गाउने, लेख्ने र संगीत भर्ने क्षमता राख्छन् ।
भिडियो :-