नायक विराज भट्टको समय राम्रो चलेको बखत उनको स्वीकृतिमा नायिका जेनिशा केसीले धेरै चलचित्रमा काम गर्ने मौका पाइन् । एक समय उनीहरु अफेयरको हल्ला समेत चलेको थियो । नचलोस् पनि कसरी, विराजका प्रायः चलचित्रमा जेनिशा लिड रोलमा हुन्थिन् । ‘निगरानी, भागी भागी नजाउ, दोस्ती, तिमी विनाको जीवन’ लगायतका चलचित्रमा उनीहरुले सँगै काम गरेका छन् ।
विराजले भोजपुरी चलचित्र गर्न थालेपछि जेनिशाले केही चलचित्रमा काम गरिन् । तर, कुनैले उनको करिअरलाई बचाउन मद्दत गरेनन् । यसपछि बलिउड प्रवेशका लागि मुम्बई हानिएकी उनी अहिले नेपालमा छिन् । उनले एक टेलिभिजन अन्तर्वार्तामा आफूले बालाजी फिल्मस्बाट निर्देशनमा डिप्लोमा गरेको बताएकी छन् । एक वर्षभित्र चलचित्र अभिनयमा पनि फर्किने उनको भनाई छ ।
![](https://i0.wp.com/www.thuloparda.com/wp-content/uploads/2020/12/jenisha-kc.jpg?resize=699%2C465&ssl=1)
बलिउडमा जान आफूले गरेको संघर्ष स्मरण गर्दै उनले भनेकी छन्, ‘मिथुन चक्रवर्तीले बोलाएर म मुम्बई गएको थिएँ । उहाँले मलाई धेरै कुरामा सहयोग गर्नुभयो । तर, बलिउडमा प्रवेश गर्न सहज छैन । जो कोहीले सक्दैन । महिलालाई झन् गाह्रो छ । मैले साढे २ वर्ष मुम्बईमा विताएँ । यसपछि लाग्यो कि विजनेशमा पनि हात हाल्नु पर्छ । अहिले दुबईमा विजनेश सुरु गरेको छु ।’
चलचित्र निर्माण गर्ने सोचमा समेत रहेकी जेनिशा आफूलाई विराज भट्टले चलचित्र ‘साङ्लो’ बाट अफर गरेको पनि बताइन् । तर, विजनेशका कारण चलचित्र गर्न नसकेको उनको भनाई छ । उनले विराजसँग आफ्नो सुमधुर सम्बन्ध रहेको पनि बताएकी छन् । मुम्बई बस्दा भोजपुरी चलचित्र ‘काशी अमरनाथ’ को एक गीतमा ठुम्का लगाएकी जेनिशा पछिल्लो पटक चलचित्र ‘एक पल’ मा देखिएकी थिइन् ।