चलचित्र ‘प्रेमगीत ३’ मा अभिनेता प्रदीप खड्काको अपोजिटमा क्रिस्टिना गुरुङ खड्का फाइनल भएकी छन् । अमेरिकामा बस्दै आएकी क्रिस्टिनालाई निर्माण टिमले आइतबार लिड अभिनेत्रीमा अनुबन्धित गरेको हो । उनी यस चलचित्रको अडिसनका लागि अमेरिकाबाट नेपाल आएकी थिइन् ।
निर्माण टिमले ‘प्रेमगीत ३’ मा ‘गीत’ क्यारेक्टरका लागि अडिसन आह्वान गरेको थियो, जसमा २७ सय बढीले आवेदन दिएका थिए । त्यसमध्ये २५ जना युवती उत्कृष्ट २५ को ‘सर्टलिस्ट’ मा परेका थिए । उनीहरुमध्ये अभिनय क्षमता, लुक्स, उचाई र सुन्दरताको हिसाबले ‘गीत’ क्यारेक्टरमा क्रिस्टिना परफेक्ट भएकाले छनोट गरिएको निर्माता सन्तोष सेनले बताए ।
‘गीत’ क्यारेक्टरमा क्रिस्टिना फाइनल भएको घोषणा गर्दै निर्माण टिमले आइतबार उनको क्यारेक्टर पोस्टर समेत सार्वजनिक गर्दैछ । प्लस टुसम्मको अध्ययन नेपालमा नै सकेर अमेरिका गएकी उनी बाल्टिमोर युनिभर्सिटीमा आइटी बिषयमा स्नातक गर्दैछिन् । परिवारसँग अमेरिकामा बस्दै आएकी उनले केही म्यूजिक भिडियोमा अभिनय समेत गरिसकेकी छन् ।
क्रिस्टिना ‘गीत’ पात्रमा अनुबन्ध भए पनि बाँकी २४ जना अयोग्य नभएको निर्माता सेन बताउँछन् । उनी भन्छन्, ‘यो कुनै प्रतिस्पर्धा थिएन र यहाँ सहभागिता जनाएका २५ जना सबै समान प्रतिभाशाली थिए । हामीले मात्र चलचित्रको कथाअनुसार सुहाउँदो ‘गीत’ को खोजी गरेका हौं । यो कुरा सबैले बुझ्न जरुरी छ ।’ उनले आशुसेन फिल्मस्को आगामी चलचित्रमा कथाअनुसार सुहाउँदो पात्र भेटे ‘प्रेमगीत ३’ मा छनोट नभएका २४ जनामा कोही रहन सक्ने पनि बताए ।
चैत २८ मा रिलिज हुने ‘प्रेमगीत ३’ लाई छेतेन गुरुङ र निर्माता सन्तोष सेनले मिलेर निर्देशन गर्दैछन् । छेतेन र मन्दिप गौतमले चलचित्रको कथा तयार पारेका छन् । ‘प्रेमगीत ३’ पहिलो र दोश्रो संस्करणभन्दा निकै ठुलो स्केलमा निर्माण हुने र नेपाली फिल्म क्षेत्रकै एउटा उदाहरण बन्ने निर्माण पक्षको विश्वास छ । चलचित्रमा शिव श्रेष्ठ, मनिष राउत, सुनिल थापा, अनुभव रेग्मीलगायतका कलाकारहरुको पनि अभिनय रहनेछ ।