गएको दुई वर्ष अगाडि प्रदर्शनमा आएको मल्टीस्टारर चलचित्र ‘लप्पन छप्पन’ को सिक्वेल ‘लप्पन छप्पन २’ बुधबार शुभ मुहूर्त गरिएको छ । कमलादीस्थित गणेश मन्दिरमा गरिएको मुहूर्त समारोहमा चलचित्रका निर्माता/निर्देशकदेखि कलाकारहरुको उपस्थिति रहेको थियो ।
चलचित्रलाई मुकुन्द भट्टले निर्देशन गर्दैछन् । पहिलो पार्टको पनि उनले नै क्याप्टेनसिप सम्हालेका थिए । ‘लप्पन छप्पन’ मा दयाहाङ राई, सौगात मल्ल, अर्पण थापा, वर्षा सिवाकोटी लिड रोलमा थिए । दोस्रो पार्टमा वर्षा अटाएकी छैनन् । बाँकी यथावत छन् ।
‘लप्पन छप्पन २’ मा अभिनेता अनुपविक्रम शाही, अभिनेत्री नम्रता श्रेष्ठ, केरोलिन कोलिन्डा, सुरविना कार्की, सृजना सिना, देव कुमारको पनि प्रमुख भूमिका रहनेछ । अनुप यसको अघिल्लो भागमा थिएनन् । यसमा उनको नेगेटिभ रोल रहेको जानकारी प्राप्त छ । असार ११ गतेबाटचलचित्रको छायांकन सुरु हुँदैछ । नेपालसहित अष्ट्रेलिया र युरोपमा चलचित्र खिचिँदैछ ।
फ्लोरमा जानुभन्दा अगावै चलचित्रको प्रदर्शन मिति महाशिवरात्रीको छेको अर्थात् फागुन ९ गतेलाई घोषणा गरिएको छ । चिजकुमार श्रेष्ठ र प्रजापति सिवाकोटीले निर्माण गर्ने चलचित्रको कार्यकारी निर्मातामा प्रकाश कुँवर र निर्मल कुमार मिश्र छन् । कथा, पटकथा र संवादमा निर्देशक भट्टलाई अमित शर्मा र विवेक पाण्डेले सघाएका छन् । पुरुषोत्तम प्रधानले खिच्ने चलचित्रलाई सुरेन्द्र पौडेलले सम्पादन गर्नेछन् ।
इपी एजुकेशन अष्ट्रेलिया र गोल्डेन हिल्स् पिक्चरको संयूक्त ब्यानरमा बन्ने चलचित्रमा राजेन्द्र भट्ट (मिस्टर आरजे), शम्भुजित बाँस्कोटा र दिपक आरजेको संगीत रहनेछ । चलचित्रमा सिमोस तामाङ एक्सन डाइरेक्टरको रुपमा अनुबन्ध भएका छन् भने एक्सन डिजाइनरमा हिमाल केसी छन् । यसमा शैलेस श्रेष्ठले ब्याकग्राउण्ड स्कोर गर्नेछन् । चलचित्रलाई ‘डेन्जरस गेम’ भनिएको छ ।