सुयोग गुरुङको डेब्यू निर्देशनमा बनेको लभस्टोरी चलचित्र ‘सानो मन’ को ट्रेलर सार्वजनिक भएको छ । यसअघि सार्वजनिक भएको ‘रानु कम्मर’ बोलको गीतले युट्युबमा सकारात्मक प्रतिक्रिया बटुल्दै गर्दा निर्माण टिमले आइतबार प्रेम र रोमान्सले भरिएको ट्रेलर सार्वजनिक गर्यो । ट्रेलरमा अभिनेता आयुष्मान देशराज जोशी र अभिनेत्री शिल्पा मास्केको प्रेममा आउने उचारचढाव देखाइएको छ ।
असार २० गतेबाट प्रदर्शनमा आउने यस चलचित्रको ट्रेलरबाट लभस्टोरी चलचित्र रुचाउने दर्शकका लागि ‘सानो मन’ उपयुक्त छनोट हुनसक्ने विश्वास गर्न सकिन्छ । कमर्शियल शैलीको मेकिङ, कलाकारको प्रस्तुती, ब्याकराउन्ड म्यूजिक, एडिटिङ, सट साइज र साउन्ड डिजाइनका हिसाबबाट हेर्दा चलचित्रको ट्रेलर उत्कृष्ट बनेको छ । ट्रेलरले चलचित्रप्रति दर्शकमा कौतुहलता जगाउने देखिन्छ ।
गौरी मल्ल, विशाल पहारी, शिशिर वाङदेल, रश्मी भट्टलगायतका कलाकारहरुको पनि यसमा अभिनय छ । ओ.पि.जी फिल्मस्, ए प्लस इन्टरटेन्मेन्ट र हाई टेक इन्टरटेन्मेन्टको संयुक्त ब्यानरमा चलचित्र बनेको हो । सुयोग गुरुङ र मिलन श्रेष्ठको सम्पादन रहेको फिल्मको भिएफएक्स नगेश कँडेलले गरेका छन् । समिर सुनवार र निर्देशक गुरुङले मिलेर लेखेको चलचित्रलाई आलोक शुक्लाले खिचेका हुन् ।
यम ओली प्रोडक्सन डिजाइन रहेको चलचित्रको एक गीत थाईल्यान्डको पतायाको समुन्द्री किनारमा खिचिएको छ । काठमाडौं, भैरहवालगायतका ठाउँहरुमा छायांकन भएको यस चलचित्रका निर्माताहरू योगेश गुरुङ, राजीव श्रेष्ठ, रमेश के. मित्तल र राजेन्द्र मानन्धर हुन् । रित बोहरा मुख्य सहायक निर्देशक रहेको ‘सानो मन’ म्युजिकल लभस्टोरी जनरामा निर्माण भएको निर्देशक गुरुङले बताए । चलचित्रलाई लिएर आयुष्मान र शिल्पा निकै उत्साहित छन् ।