अभिनेत्री नम्रता श्रेष्ठले मिक्स मार्शल आर्ट खेलाडीको भूमिकामा अभिनय गरेको चलचित्र ‘जाइरा’ को अफिसियल टीजर सार्वजनिक भएको छ । बुधवार राजधानीमा पत्रकार सम्मेलन आयोजना गर्दै चलचित्रको टीजर सार्वजनिक गरिएको हो । टीजरमा अभिनेत्री नम्रता मात्र फिचर्ड छिन् । उनलाई भिन्न लुक्समा देख्न सकिन्छ ।
यो चलचित्र आउँदो भदौ ६ गतेबाट देशभर प्रदर्शनमा आउँदैछ । यसका निर्देशक आशुतोष राज श्रेष्ठ हुन् । चलचित्रमा नम्रतासँगै अनुप बिक्रम शाही, प्रमोद अग्रहरी, रेमन दास श्रेष्ठसहित नव-कलाकारहरु श्रृजना रेग्मी, सुजता श्रेष्ठ र सम्राट मगरको अभिनय रहेको छ ।
नव-अभिनेत्री रेग्मी पनि चलचित्रमा खेलाडीको रुपमा रहेकी छिन् । नव-अभिनेता मगर नम्रताको कोचको भूमिकामा छन् । प्रसन्न गोपाली कार्यकारी निर्माता रहेको ‘जाइरा’ का पटकथाकार निर्देशक श्रेष्ठ र निरोज महर्जन हुन् । कटामरी फिल्म्सको सहकार्यमा नम्रता श्रेष्ठ प्रोडक्शन र ट्रेन्डसेटर्स प्रा.लि.को प्रस्तुतीमा चलचित्र बनेको हो ।
चलचित्रलाई लोकेश बज्राचार्यले सम्पादन गरेका छन् । कल्याण सिंह, डिजे राजु र टम्ब्लीविडको संगीत रहेको यो चलचित्रमा सम्राट बस्नेतको द्वन्द्व निर्देशन रहेको छ । भने, द्वन्द्व कोरियोग्राफी राउल मोक्तान र मेघवार चेम्जोङको छ । यस चलचित्रमा केशव थापाको नृत्य निर्देशन छ भने डि.ओ.पी. बाबु श्रेष्ठको रहेको छ ।
अभिनेत्री नम्रताले फिल्म एउटा मार्सल आर्टिस्टको बदलाको कथामा बनेको बताइन् । उनी भन्छिन्, ‘शारिरिक, मानसिक तथा भावनात्मक रुपमा कथालाई न्याय दिन मैले आफ्नो कपाल पनि काटेकी थिएँ । हामीले एउटा राम्रो महिला प्रधान एक्शन चलचित्र बनाउने प्रयास गरेका छौँ ।’ निर्देशक श्रेष्ठले दर्शकलाई निराश बनाउन हुँदैन भन्ने मान्यतका साथ आफूले चलचित्र बनाएको बताए ।
टीजर हेर्नुहोस् :-