‘मारुनी’ पोस्टरमा साम्राज्ञी र पुष्पको प्रेम

अभिनेत्री साम्राज्ञी आरएल शाह र अभिनेता पुष्प खड्का स्टारर चलचित्र ‘मारुनी’ को फस्टलुक पोस्टर सार्वजनिक भएको छ । भदौ १३ गते रिलिज हुने चलचित्रको पोस्टरमा साम्राज्ञी र पुष्प मात्र फिचर्ड छन् । दुईलाई रोमान्टिक अवतारमा देख्न सकिन्छ ।

एक पोस्टरमा साम्राज्ञी कालो बोल्ड पहिरनमा घोडामाथि चढेकी छन् । घोडा पुष्पले डोर्‍याएका छन् । दोस्रो पोस्टरमा भने साम्राज्ञी एक रुखमा अढेस लगाएकी छन् । उनको कम्मरमा पुष्पले हात राखेका छन् । पोस्टरले दर्शकमा चलचित्रप्रति कौतुहलता सृजना गर्नेमा निर्माण टिम विश्वस्त छ ।

पूनम इन्टरटेन्मेन्टको ब्यानरमा पूनम गौतमले निर्माण गरेको यो चलचित्रलाई ‘मंगलम’ फेम्ड निर्देशक नवल नेपालले निर्देशन गरेका हुन् । राजा प्रधान, दर्शना केसी, मिना क्षेत्री चलचित्रका सह–निर्मातामा छन् । चलचित्रको बिषयवस्तुको बारेमा यसको निर्माणपक्षले केही पनि बोलेको छैन । चलचित्रलाई संजय लामाले खिचेका हुन् ।

चलचित्रमा नायिका रेविका गुरुङको पनि मुख्य भूमिका छ । ‘मारुनी’ को बिषयमा निर्मात्री गौतम भन्छिन्, ‘हामीले यसपटक दर्शकको मुटुलाई छुने कथामा चलचित्र बनाएका छौ । चलचित्रमा थुप्रै ट्विस्ट छन् । दर्शकको मन छुन्छ ।’

अभिनेत्री साम्राज्ञी राज्यलक्ष्मी शाहले ‘मारुनी’ लाई आफ्नो करिअरको महत्त्वकांक्षी चलचित्र बताएकी छन् । उनले यस्तो भूमिका यसअगाडि आफूले नगरेको बताइन् । पुष्प पनि चलचित्रलाई लिएर उत्साहित छन् ।