अभिनेत्री श्वेता खड्का अस्वस्थ भएपछि रोकिएको चलचित्र ‘हेल्लो जिन्दगी’ को छायांकन गएको हप्ताबाट सुरु भएको छ । उनी पूर्ण रुपमा निको नभएपछि अभिनेत्री प्रियंका कार्कीलाई अनुबन्ध गर्दै चलचित्रको बाँकी छायांकन सुरु भएको हो । गएको महिना गर्धनमा अचानक ट्युमर देखिएपछि श्वेताले भारतमा शल्याक्रिया गराएकी थिइन् ।
उनको स्वास्थ्य अवस्था अचानक विग्रिएपछि निर्माण टिमले चलचित्रको छायांकन रोकेको थियो । उनी पूर्ण रुपमा निको भएपछि छायांकन सुरु गर्ने तयारीमा निर्देशक एभरेष्ट सूर्य बोहोरा थिए । तर, श्वेता पूर्ण रुपमा निको हुन अझै केही समय लाग्ने भएपछि जेठ ११ गतेबाट चलचित्रको पुनः छायांकन सुरु भएको छ । अब, उनले स्वास्थ्य अवस्थाका कारण गर्न नसकेको भूमिकामा प्रियंकाले अभिनय गर्नेछिन् ।
गएको बिहीवार प्रियंकाले चलचित्रमा आफ्नो पहिलो सट दिएकी छन् । काठमाडौंमा केही साताको छायांकनपछि आफू निर्माण टिमसँग युरोप प्रस्थान गर्ने प्रियंकाले जानकारी दिएकी छन् । उनले चाँडै निर्देशक बोहोरासँग अर्को चलचित्रमा पनि सहकार्य गर्दैछिन् । ‘चलखेल’ नामक चलचित्रमा उनले काम गर्ने फाइनल भइसकेको छ । ‘हेल्लो जिन्दगी’ को छायांकन सकिए लगत्तै उनी यो चलचित्रमा व्यस्त हुनेछिन् ।
‘हेल्लो जिन्दगी’ मा उनीसँगै अभिनेत्री दीपिका प्रसाईं पनि प्रमुख भूमिकामा छिन् । निर्देशक बोहोरा लेखनमा बन्ने चलचित्रलाई सृजना जोशीले निर्माण गर्दैछिन् । फिल्म विरान्जना इन्टरटेन्मेन्टको ब्यानर बन्न लागेको हो । सलोन बस्नेत, विल्सन विक्रम राई, विक्रान्त बस्नेतलगायतका कलाकारहरुको पनि अभिनय रहने चलचित्रका गीतमा बसन्त सापकोटाको संगीत र निशान भट्टराइले स्वर रहनेछ ।