यही बैशाख २७ गतेबाट देशभर प्रदशनमा आउँदैछ चलचित्र ‘पसिना’ । मजदुरहरुको कथाव्यथामा आधारित भएर बनेको यसमा अभिनेता गौरव पहारी र अभिनेत्री अनु शाह लिड रोलमा छन् । ‘नैना रेशम’, ‘शिशा’ लगायतका चलचित्र निर्देशन गरिसकेका आर बि खत्री ‘शरद’ निर्देशित यस चलचित्रको गीतसंगीत र ट्रेलरलाई युट्युबमा दर्शकहरुले राम्रो रुचाएका छन् ।
चलचित्रको प्रचारमा पनि निर्माण टिम राम्रै दौडिरहेको छ । निर्देशक खत्री यस चलचित्रले इनिसियल मारामार गर्ने अपेक्षा आफूहरुको नभएको बताउँछन् । ‘पसिना’ आर्टिस्टिक कलरको चलचित्र रहेको उनको भनाई छ । यस फिल्मले उठाएको कथामा जो कोहीले चलचित्र बनाउन हिम्मत नगर्ने उनको जिकिर छ ।
उनी भन्छन्, ‘अहिलेको अवस्थामा ‘पसिना’ को कन्टेन्ट एकदमै रिक्स कन्टेन्ट हो । जो कोहीले यस्ता कन्टेन्टमा चलचित्र नै बनाउन सक्दैनन् । यो चलचित्र हामीले कमाउने उद्येश्यले भन्दा पनि समाजमा सन्देश दिनका लागि बनाएका हौं ।’ चलचित्रले कुनै काम सानो ठूलो हुँदैन भन्ने सन्देश प्रवाह गर्ने उनले बताए ।
चलचित्रमा सरोज अर्याल, रवि गिरी, ध्रुव कोइराला, शारदा गिरीलगायतका कलाकारको पनि अभिनय रहेको छ । चलचित्रमा राम केसीको छायांकन, राजनराज सिवाकोटी, दिपक शर्मा र थिरज राइको संगीत, नबिन निरौलाको सम्पादन, शिव विक र राजिव समिरको नृत्य र देव महर्जनको द्वन्द रहेको छ । ‘पसिना’ को निर्माता शान्ता ढकाल हुन् । भने, कार्यकारी निर्माता सञ्जय महत्तो हुन् ।