जेठ १७ मा आउने भयो सविको ‘काउसो’

बैशाख २० गतेबाट अभिनेता सविन श्रेष्ठको प्रमुख भूमिका रहेको चलचित्र ‘काउसो’ जेठ १७ मा देशभर प्रदर्शनमा आउने भएको छ । पूर्वघोषित मितिमा चलचित्र ‘दाल भात तरकारी’ आउने भएपछि यो चलचित्रले आफ्नो रिलिज केही हप्ता पछाडि सारेको हो । यसलाई निर्देशक मदन घिमिरेले निर्देशन गरेका हुन् ।

अर्नभ फिल्मस प्रोडक्सन प्रा.लिको प्रस्तुति रहेको चलचित्रमा सविन श्रेष्ठ, अर्जुन गुरुङ, अनु पराजुली, रामचन्द्र अधिकारी, सुरेन्द्र अधिकारी, नविन आचार्यलगायतका कलाकारहरुकोे अभिनय छ । अर्नभ बस्नेत प्रस्तुतकर्ता रहेको चलचित्र कमेडी जनरामा निर्माण भएको निर्देशक घिमिरेले बताएका छन् ।

चलचित्रको निर्मातामा सिताराम तिमल्सिना ज्याक र भगवान खत्री छन् । निर्देशक स्वयंको कथा रहेको चलचित्रको पटकथा तथा संवाद भोजराज देवकोटाले लेखेका हुन् । चलचित्रमा विकास चौधरीको संगीत, शंकर महर्जनको द्वन्द्व, विक्रम स्वाँरको नृत्य रहेको छ ।

रामेश्वर हुमागाइँको छायांकन रहेको चलचित्रको सम्पादन नविन निरौलाले गरेका हुन् । चलचित्रका कार्यकारी निर्मातामा अन्चिला केसी रहेकी छिन् । उपत्यका भित्र वि.के फिल्मस् र उपत्यका बाहिरका लागि यो फिल्म एफडी कम्पनीले वितरण गर्देछ । चलचित्रले दर्शकलाई भरपूर मनोरञ्जन दिने निर्देशक घिमिरको दाबी छ ।