दीवाकरको चलचित्रमा आर्यन र दीपिकाको जोडी ?

लभस्टोरी चलचित्र बनाउन सिपालु मानिने निर्देशक अहिले एक लभस्टोरी चलचित्रको तयारीमा जुटेका छन् । उनले निर्देशन गरेको पछिल्लो फिल्म ‘क्याप्टेन’ गएको फागुनमा प्रदर्शनमा आएको थियो । यसमा अनमोल केसी लिड रोलमा थिए । अब उनले अभिनेता आर्यन सिग्देल र अभिनेत्री दीपिका प्रसाइँलाई लिएर चलचित्र बनाउन लागेका हुन् ।

चाँडै अभिनेत्री दीपिका प्रसाइँसँग लगनगाँठो कस्न लागेका निर्देशक भट्टराई दशैंपछि चलचित्रको छायांकन सुरु गर्ने सोचमा छन् । उनको आफ्नै कथामा बन्ने चलचित्रको अहिले स्क्रिप्टमा काम भइरहेको जानकारी प्राप्त छ । निर्देशक भट्टराईले चलचित्रमा आर्यन र दीपिका हुने फाइनल नभएको बताएका छन् ।

आफ्नो नयाँ प्रोजेक्टमा आर्यन र दीपिकाको जोडी बाँधिन लागेको विषयमा निर्देशक दीवाकरले भने- ‘आर्यन जीसँग कुरा मात्र भएको हो । फाइनल भएको छैन । धेरै पहिला मैले उहाँ (आर्यन) लाई सोचेर एउटा कन्सेप्ट बनाएको थिए । उहाँलाई त्यो कन्सेप्ट सुनाएको मात्र हुँ । स्क्रिप्ट फाइनल भएपछि मात्र उहाँ हुने/नहुने टुंगो लाग्छ ।’

दीवाकरले विवाहभन्दा अगाडि नयाँ चलचित्र गर्ने सोचमा नभएको पनि स्पष्ट पारेका छन् । ‘अहिले म स्क्रिप्ट राईटरहरुसँग सल्लाह गरिरहेको छु । मसँग चलचित्रको कन्सेप्ट मात्र छ । त्यसलाई पटकथामा ढाल्न अझै केही समय लाग्छ । विवाहभन्दा अगाडि चलचित्र बन्दैन । विवाहको २/३ महिनापछि चाहिँ सुरु हुन सक्छ’, उनले भने ।