फरक शैलीमा आफूले निर्माण गर्ने चलचित्रको घोषणा, प्रचार प्रसार र प्रिमियर गर्दै आएका निर्देशक तथा निर्माता मिलन चाम्सले यही जेठ ३ गतेबाट देशभर प्रदर्शनमा आउन लागेको यस वर्षको प्रतिक्षीत चलचित्र मध्येको एक ‘बीर विक्रम २’ पृथक शैलीमा आयोजना हुने भएको छ । चलचित्रको जेठ १ गते प्रिमियरमा हुँदैछ ।
चलचित्रमा अभिनय गर्ने कलाकारदेखि नेपथ्यमा बसेर काम गर्ने प्राविधिकहरुको सम्मानका लागि पर्पल कार्पेट प्रिमियर आयोजना गर्न लागेको निर्देशक चाम्सले जानकारी दिएका छन् । यसले कलाकार र प्राविधिकबीच आत्मियता बढाउने उनको विश्वास छ । प्रायः चलचित्रको रेड कार्पेट प्रिमियर हुने गर्दछ । ‘बीर विक्रम २’ को किन पर्पल ?
निर्देशक चाम्स भन्छन्, ‘चलचित्रको थिमसँग मिल्ने भएकाले पर्पल कार्पेट प्रिमियर गर्न लागेका हौं ।’ चलचित्रको राजधानीमा रहेको कुमारी हलमा प्रिमियर हुनेछ । प्रेम र मित्रताको कथामा निर्माण भएको यस चलचित्रमा अभिनेता द्वय पल शाह र नाजिर हुसेनसँगै अभिनेत्री वर्षा सिवाकोटी लिड रोलमा छन् । केही दिनमा यस चलचित्रको मोफसल टुर सुरु हुँदैछ ।
‘पिरतीको मिठो तिर्सना’ बोलको रिमेक गीतले चलचित्रको राम्रो हाइप निर्माण गरिरहेको अवस्थामा केही दिन अगाडि निर्माण टिमले ट्रेलर सार्वजनिक गरेको थियो । ट्रेलरलाई पनि दर्शकले रुचाएका छन् । यस चलचित्र कलाकार बुद्धि तामाङ भिलेनको रुपमा प्रस्तुत भएका छन् । प्रदीप भारद्धाजको कथामा बनेको ‘बीर विक्रम २’ का छायाँकार सुदीप बराल हुन् ।