‘पसिना’ का लागि सुरजनीको बोल्ड फोटोसुट

अभिनेत्री सुरजनी केसीले अभिनय गरेको चौथो चलचित्र ‘पसिना’ यही बैशाख २७ गतेबाट देशभर प्रदर्शनमा आउँदैैछ । यसमा उनको भूमिका सहायक अभिनेत्रीको छ । लिड हिरोइनमा अनु शाह छिन् । गौरव पहारी लिड हिरोको रुपमा छन् ।

आर.बि. खत्री ‘शरद’ ले निर्देशन गरेको यस चलचित्रको प्रचार-प्रसारमा लिड कलाकारले खासै साथ दिएका छैनन् । अनु भिडियोमा व्यस्त छिन् भने गौरव चलचित्र ‘साइँली’ रिलिजपछि कहाँ छन् अत्तोपत्तो छैन । लिड हिरो र हिरोइनले नै प्रचारमा साथ नदिएपछि सहायक भूमिकामा रहेकी सुरजनी अगाडि सरेकी छन् ।

केही दिनदेखि निर्माण टिमले चलचित्रको प्रचारका लागि बोलाएको ठाउँमा उनी समय निकालेर पुग्ने गरेकी छन् । चलचित्रमा आफ्नो सहायक भूमिका भए पनि सम्झनलायक रहेको उनको भनाई छ । भूमिका र कथावस्तु मन परेपछि ‘पसिना’ गरेको बताउने उनी चलचित्रले दर्शकलाई निराश नबनाउने दाबी गर्छिन् ।

यसअघि ‘सपना तिम्रो मेरो’, ‘सुन्तलीलाई भगाई लग्यो झिल्केले’ चलचित्रमा काम गरिसकेकी सुरजनीले यस चलचित्रमा एक साधारण युवतीको भूमिका निभाएकी छन् । तर, हालै उनले स्टुडियो क्रेज नेपालमा पुगेर यस चलचित्रका लागि हट एण्ड बोल्ड फोटोसुट गराएकी छन् । ‘पसिना’ को निर्माता शान्ता ढकाल हुन् । भने, कार्यकारी निर्माता सञ्जय महत्तो हुन् ।