फ्लोरमा नजाँदै ‘प्रेमगीत ३’ को प्रदर्शन मिति घोषणा

छायांकनमा जानुभन्दा अगाडि नै हिट चलचित्र ‘प्रेमगीत’ को तेस्रो सिरिजको प्रदर्शन मिति घोषणा गरिएको छ । फस्टलुक पोस्टर सार्वजनिक गर्दै निर्माण टिमले नयाँ वर्ष २०७७ लाई लक्षित गर्दै यस वर्षको चैत २८ गते चलचित्रको प्रदर्शन मिति घोषणा गरेको छ । सार्वजनिक पोस्टरले भने चलचित्र पिरियड ड्रामा रहेको प्रस्ट्याउँछ ।

दुई सिरिजको सफलतापछि निर्माता सन्तोष सेनले ‘प्रेमगीत ३’ निर्माण गर्न लागेका हुन् । यस चलचित्रको दोस्रो सिरिजमा उनको पनि प्रमुख भूमिका थियो । तेस्रो पार्टमा भने उनी निर्देशकको रुपमा भित्रिएका छन् । अभिनय रहने/नरहने खुलाइएको छैन । उनीसँगै चलचित्रलाई ‘डमरुको डण्डीबियो’ फेम्ड निर्देशक छेतन गुरुङले पनि निर्देशन गर्दैछन् । यसको कथा छेतनकै हो ।

‘प्रेमगीत’ को पहिलो सिरिजबाट स्टारको रुपमा उदाएका प्रदीप खड्का फेरि प्रेमको भूमिकामा देखिँदैछन् । यद्यपि, उनी ‘प्रेमगीत ३’ मा फाइनल भएको वा नभएकोबारे निर्माण टिम मौन छ । यस चलचित्रको अघिल्लो दुई सिरिजमा उनी नै लिड हिरो थिए । चलचित्रमा प्रदीपको अपोजिटमा नायिका पनि फाइनल भइसकेको स्रोत बताउँछ । तर, निर्माण टिमले नाम गोप्य राखेको छ ।

यस चलचित्रबाट नीति शाहले डेब्यू गर्ने चर्चा छ । यो चलचित्र अफर आएको नीति स्वयंले खुलाएकी थिइन् । निर्माण टिमले अभिनेता प्रदीपको पिताको भूमिकामा अभिनेता राजेश हमाललाई पनि अप्रोच गरेको छ । तर, उनले गर्ने/नगर्ने कुनै निर्णय लिएका छैनन् । यस चलचित्रको कथा २ सय वर्ष पुरानो रहेको बताइएको छ । चलचित्रलाई ‘निषेध गरिएको प्रेमकथा’ भनिएको छ ।