दोस्रो साता पनि ‘ए मेरो हजुर ३’ को कमाई आक्रामक

नयाँ वर्ष २०७६ को छेकोमा आएको झरना थापा निर्देशित दोस्रो चलचित्र ‘ए मेरो हजुर ३’ ले अहिले बक्सअफिसमा मनग्य पैसा छापिरहेको छ । चलचिले प्रदर्शनको चार दिनमा ४ करोड कमाएको रिपोर्ट प्राप्त भएको थियो । गत शुक्रवारबाट चलचि दोस्रो हप्तामा प्रदर्शनरत छ । प्रदर्शनको पहिलो हप्ता फिल्मको कलेक्सन आक्रामक रहेको वितरक मनोज राठी बताउँछन् ।

चलचित्रले प्रदर्शनको पहिलो दिन शुक्रवार, दोस्रो दिन शनिवार र तेस्रो दिन अर्थात् नयाँ वर्षको दिन आइतवार कमाईमा ठूलो छलाङ्ग मारेको थियो । सोमवारदेखि बिहीवारसम्म पनि चलचित्रले आक्रामक व्यापारलाई निरन्तरता दिएको वितरक राठीको भनाई छ । चलचित्रले पहिलो हप्ता साढे ५ करोडको आसपास व्यापार गरेको अनुमान गरिएको छ ।

ब्रान्ड नाम, स्टारपावर, गीतसंगीत र ट्रेलरका कारण इनिसियल बक्सअफिस आक्रामक रहेको अभिनेता अनमोल केसी र डेब्यू गर्ल सुहाना थापा स्टारर ‘ए मेरो हजुर ३’ लाई दोस्रो हप्ता भने शुक्रवारबाट प्रदर्शनमा आएको बलिउडको बिग बजेटको मल्टिस्टारर चलचित्र ‘कलंक’ ले असर गर्ने कतिपयको अनुमान थियो । तर, दोस्रो हप्ता पनि चलचित्रले बक्सअफिसमा आफ्नो दबदबा कायमै राखेको छ । ‘कलंक’ ले यसलाई खासै असर गरेको छैन ।

चलचित्रले शुक्रवार र शनिवार मल्टीप्लेक्स र सिंगल स्क्रिन दुबैतिर देशभर हाउसफुल व्यापार गरेको बताइएको छ । पहिलो हप्ताको कलेक्सनबाटै लगानी सुरक्षित भएपछि खुसी देखिएका निर्माता सुनिल कुमार थापा दोस्रो हप्ता पनि हलमा दर्शकको चाप कम नभएको बताउँछन् । ‘वर्ड अफ माउथ’ बलियो भएका कारण चलचित्र बक्सअफिसमा लामा रेसको घोडा बन्ने उनको विश्वास छ । दोस्रो हप्ताबाट यो चलचित्र नाफाको बाटोमा अगाडि बढेको छ ।

शनिवार निर्देशक झरना दोस्रो पटक दर्शकसँग प्रत्यक्ष साक्षात्कार गर्न अभिनेता अनमोल र छोरी सुहानालाई लिएर गोपीकृष्ण हल पुगेकी थिइन् । दिउँसो साढे १ बजे गोपीकृष्ण पुग्दा चलचित्र हेर्नका लागि टिकट काट्ने र अनमोल-सुहानालाई हेर्ने दर्शकको ठूलो भीड देखिएको थियो । हरेक पटकझैँ अनमोललाई देखेपछि रुने र चिच्याउने युवतीहरु कम थिएनन् । सुहानाको क्रेज पनि गजब देखिएको थियो । दुबैले दर्शकलाई हात जोडेर धन्यवाद व्यक्त गरे ।

गोपीकृष्णको बालकुनीमा पुगेपछि अनमोलले आफ्नो तश्बिर छापिएको केही थान टिर्सट दर्शकलाई बाँडे । टिर्सटमा उनले आफ्नो हस्ताक्षर गरेका थिए । अनमोलले फ्याकेको टिर्सट आफ्नो बनाउन दर्शकबीच ठूलै घम्साघम्सी परेको थियो । उनले चलचित्रमा आफूले निभाएको ‘प्रेम र धनश्याममध्ये कुन क्यारेक्टर मनपर्‍यो ?’ भन्दै दर्शकलाई सोधेका थिए । दर्शकले धनश्याम मनपरेको जवाफ फर्काए । उनी चलचित्रप्रति दर्शकको उत्साहले दंग देखिन्थे ।

यो चलचित्रबाट अभिनेत्री सुहाना थापाले सानदार डेब्यू गरेकी छन् । उनलाई भविष्यको स्टार भनिन थालिएको छ । उनको अभिनयको अहिले समीक्षक र दर्शक सबैले मुक्तकण्ठले प्रशंसा गरिरहेका छन् । डेब्यू चलचित्रबाटै उनले लोभलाग्दो फ्यान फलोइंग बनाएकी छन् । चलचित्रमा उनले एक डाइहार्ट फ्यानको भूमिका निभाएकी छन् । ‘ए मेरो हजुर ३’ मा सलोन बस्नेत, अर्पण थापा, रेअर राई, सरोज खनाललगायतका कलाकारहरुको पनि अभिनय छ ।