कात्तिक १६ गतेबाट देशव्यापी प्रदर्शनमा आउन लागेको चलचित्र ‘चङ्गा चेट’ मा समावेश लोक फ्लेवरको ‘गोजीमा दाम छैन…’ गीत अहिले सामाजिक सञ्जाल प्रयोगकर्तामाझ प्रसिद्ध हुँदै गएको छ । युवा पुस्ताको यथार्थ समस्या बोलेको गीतलाई साढे ६ लाख बढीले यूट्युबमा हेरिसकेका छन् ।
उक्त गीत अहिले म्युजिकल्लीमा पनि उतिक्कै हिट छ । चलचित्रकी निर्मात्री शर्मिला पाण्डेका अनुसार, म्युजिकल्लीमा ४ हजार बढीले गीतमाथि टिक टक बनाएका छन् । उनी गीतलाई दर्शकले रुचाएकोमा गदगद देखिएकी छन् ।
उता ‘चङ्गा चेट’ निर्देशक दीपेन्द्र के. खनाल गीतले चलचित्रको हाइप बढेकोमा दङ्ग छन् । ‘चरी चट्ट परी’, ‘टाकान टुकुन’, ‘सुर्के थैली खै ?’ लगायतका सर्वाधिक हिट गीत दिएका गायक तथा संगीतकार राजनराज सिवाकोटीले फेरि दर्शकलाई अर्को उत्कृष्ट गीत पस्केका छन् ।
‘गोजीमा दाम छैन…’ मा उनको स्वरसँगै संगीत छ । उनलाई गायनमा मेलिना राई र ग्रिस्मा सिवाकोटीले साथ दिएका छन् । हरिहर तिमल्सिनाले गीतका शब्द लेखेका हुन् । गीतको भिडियोमा चलचित्रका प्रमुख कलाकारहरु आयुष्मान देशराज जोशी, प्रियंका कार्की, सुरक्षा पन्त, रविन्द्र झा, सन्दिप क्षेत्री र परमिता आरएल राणा फिचर्ड छन् ।
‘चङ्गा चेट’ को कथा प्रदीप भारद्वाजले लेखेका हुन् । माधव वाग्ले निर्मित यो चलचित्रमा अर्जुन पोखरेलको पनि संगीत छ । निरक कँडेलको छायांकन रहेको चलचित्रको सम्पादन दिर्घ खड्काले गरेका छन् ।
गीत हेर्नुहोस् :-